Charter Document - 03840002
| Charter Number: | 03840002 |
|---|---|
| Cartulary Title: | Baden Stadtarchiv Urkunden 1285 - 1545 [1350] |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1285 |
| Date type: | Internal, A.D. |
| Resource Link(s): |
Monasterium.net |
Charter:
In nomine Domini amen Nos Leutoldus miles de Chreusbah considerantes nos manentem civitatem in hoc seculo non habere cum possessionibus nostris transitoriis a Domino nobis collatis futuram inquirere decrevimus et celestem ubi centuplum recipitur in mercede quicquid in ista vita in Christi distribuitur caritate Quam ob rem presentibus scriptis notum fieri volumus tam modernis quam posteris scire volentibus universis quod nos de consensu et bona voluntate dilecte uxoris nostre Offemie et gratissimorum filiorum nostrorum Wernhardi Hainrici Friderici Eggeldich et Leutoldi ecclesiam in Paden sitam quam ad divini cultus reverentiam in nostre proprietatis area edificavimus propriis sumptibus et expensis dilectis nobis in Christo viris religiosis fratribus heremitis ordinis sancti Augustini totique ordini ipsorum libere contulimus tali adhibita condicione ut idem fratres conventum fratrum suorum ibidem teneant sine fine qui secundum ordinis ipsorum consuetudinem missarum sollempnia et alia divina officia in eodem loco celebrent ob nostrarum animarum et omnium progenitorum nostrorum remedium salutare Pro sustentacione autem predicti conventus quia in heremis ibi habitant ubi cottidiane mendicacionis sue officium non valent exercere septem vineas quarum prima sita est in Nusbaha dicta Winchler secunda in Dornbah in Scheuchenpeund et quatuor site in Gumpolzchirchen quarum una dicitur in Braca secunda in Reyt tercia in Sezze quarta in Stainvelden quinta in monte qui dicitur Pechstain et domum sitam in Nova Civitate quam Heinricus dictus Padner et uxor sua Golda inhabitare debent pro tempore vite sue Que omnia predictis fratribus et ipsorum ordini contulimus eo iure quo ea possedimus actenus pace libera et quiete Ut autem hec nostre donacionis beneficia irrevocabilem habeant firmitatem presentes litteras sigilli nostri et dilectorum amicorum nostrorum Alberti dicti Rinderschinkh Berhtoldi de Ebergoezsigg Leupoldi de Snephinstain Alberti de Olaht appensionibus insignitas fratribus super nominatis tradimus aput eos eternaliter pro testimonio reservandas Acta sunt hec anno Domini MCCLXXXV quinto idus iunii regnante in partibus Austrie Romanorum regis filio nobilissimo duce Alberto