Charter Document - 03830001
| Charter Number: | 03830001 |
|---|---|
| Cartulary Title: | Altenburg, Benediktiner 1144 - 1300 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1282 |
| Date type: | Internal, A.D., Calendar |
| Resource Link(s): |
Monasterium.net |
Charter:
Nos Vlricus diuina miseratione abbas in Altenburch scire volumus vniuersos presentes litteras inspecturos quod cum magister Heinricus rector ecclesie in Gors nomine eiusdem ecclesie nobilem virum Vlricum dictum Marcium militem de Chotzendorf super medietate decimarum cuiusdam lanei in Chotzendorf qui vocatur laneus Vrezzinne ac super decimis cuiusdam agri eiusdem ville qui vocatur ager Poeppinne iuxta viam ecclesie coram domino Jordano plebano de Recz judice super hoc a domino nostro domino Wichardo venerabili Pataviensi episcopo delegato traxisset in causam idem miles instructus plene de iure ecclesie supradicte voluntate spontanea recognouit quod eedem decime ad ius et proprietatem ipsius ecclesie pertinerent et de eisdem cedens libere renunciauit expresse omni iuri si quod sibi in eisdem competere videbatur ita quod ipsa ecclesia de cetero easdem decimas perpetuo percipere debeat et tenere Dictus vero magister H prefati militis sinceritatem qua circa huiusmodi negotium movebatur considerans ut animum ipsius ad maiorem devotionis fervorem sepedicte ecclesie exhibendum accenderet ex gratia speciali et mera liberalitate admisit quod idem miles fructus decimarum predictarum quas ut premissum est ecclesie memorate libere resignavit quamdiu ipse magister H rector eiusdem ecclesie fuerit percipere debeat dummodo per aliquam ingratitudinem non reddat huiusmodi gratia se indignum ita tamen quod eadem liberalitas sive gratia vitam ipsius militis non excedat nec ad heredes ipsius aliquatenus extendatur Et ne super hiis inposterum aliqua dubietas oriatur ad petitionem prefatorum virorum tam magistri Henrici quam etiam militis presentes exinde confici litteras procuravimus et eas nostri sigilli munimine duximus roborandas Actum in Altenburch anno domini millesimo CCLXXXII Nonis Septembris