Charter Document - 03820011
Charter Number: | 03820011 |
---|---|
Cartulary Title: | Archiv der Erzdiözese Salzburg 1002 - 1300 |
Charter Language: | Latin |
Charter Origin: | Religious |
Charter Type(s): | Indulgence |
Date: | 1296 |
Date type: | Internal, A.D., Papal |
Resource Link(s): |
Monasterium.net |
Charter:
Uniuersis sancte matris ecclesie filiis ad quos presentes littere peruenerint Nos dei gratia Basilius Jerosolimitanus et Bonauentura Ragusinus Archiepiscopi Petrus Stagni et Curzule Andreas Lidensis et Frater Maurus Ameliensis Episcopi salutem in domino sempiternam Quoniam ut ait apostolus omnes stabimus ante tribunal Christi recepturi prout in corpore gessimus siue bonum fuerit siue malum oportet nos diem messionis extreme misericordie operibus preuenire ac eternorum intuitu seminare in terris quod reddente domino cum multiplicato fructu recolligere ualeamus in celis firmam spem fiduciamque tenentes quoniam qui parce seminat parce et metet et qui seminat in benedictionibus de benedictionibus et metet uitam eternam Cupientes igitur ut ecclesia Sancte Marie de Fharr Salzburgensis diocesis Congruis honoribus frequentetur et a cunctis Christi fidelibus iugiter ueneretur Omnibus uere penitentibus et confessis qui ad dictam ecclesiam causa deuocionis seu peregrinationis accesserint uel ibidem diuinum officium seu uerbum exhortationis audierint mente pia In festis subscriptis videlicet Natiuitatis domini Resurrectionis Ascensionis et Pentecostes in festo Sancti iohannis Baptiste in festo omnium apostolorum et Euuangelistarum et in omnibus festiuitatibus Beate Marie Virginis Beatorum Stephani et Laurencii Martirum Nicolai et Martini confessorum Sancti Michaelis Archangeli Beatarum Katerine et Margarete Virginum Beate Marie Magdalene in festo omnium Sanctorum in dedicatione dicte ecclesie et per octauas predictarum festiuitatum in omnibus diebus dominicis et per totam quadragesimam uel qui ad sustentationem luminarium uestimentorum librorum Calicum uel aliorum necessariorum dicte ecclesie pertinentium ac fabrice eiusdem manus porrexerint adiutrices seu in extremis laborantes quicquam facultatum suarum legauerint pro quacumque uice Nos de omnipotentis dei misericordia Beateque semper Virginis Marie nec non et Beatorum Petri et Pauli apostolorum atque omnium Sanctorum eius auctoritate confisi Quilibet nostrum singillatim quadraginta dies de iunctis sibi penitenciis dummodo censensus diocesani ad id accesserit misericorditer in domino relaxamus In cuius rei testimonium presens scriptum Sigillorum nostrorum munimine duximus roborandum Datum Rome apud sanctum Petrum anno domini MCC Nonogesimo Sexto Pontificatus domini Bonifacii Pape Octaui Anno Secundo