Charter Document - 03810020
| Charter Number: | 03810020 |
|---|---|
| Cartulary Title: | Ardagger, Kollegiat 1049 - 1300 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1288 |
| Date type: | Internal, A.D., Calendar |
| Resource Link(s): |
Monasterium.net |
Charter:
Iniuriatur nonnunquam oblivio memorie et longinquitate sepe fit temporis ut res clara presentibus obscura reddatur posteris et futuris Ideoque ne illa que aguntur in tempore simul labantur cum tempore et ne cum caducis cadant et cum decedentibus decedere videantur prudentum providit cautela hominum gesta contra oblivionis periculum scripture testimonio roborari Hinc est quod ego Hermanus permissione divina Ardacensis ecclesie prepositus constare cupio tam presentibus sentibus quam futuris ad quos pervenerit presens scriptum quod ego hubam sitam in dem Chalmuntzpach quam cum mea pecunia videlicet pro XVIII libris Wiennensium denariorum comparavi legavi disposui ac ordinavi ob remedium anime mee post mortem meam fratribus ac canonicis ecclesie Ardacensis ita videlicet ut postquam me ab hac vita decedere contingat ipsi fratres hubam prefatam cum omnibus iuribus et utilitatibus suis ad usus fratrum communes in perpetuum ordinent et disponant hoc modo apposito et adiecto ut in die seu in anniversario obitus mei singulis annis ipsi fratres cum choro cantent vigilias mortuorum et missam celebrent pro defunctis illaque die de censu ejusdem hube qui tunc custos ecclesie fuerit sex solidos denariorum inter canonicos qui tunc eisdem exsequiis interfuerint dividat et alios sex solidos in die beati Corbiniani confessoris atque pontificis distribuet inter canonicos qui missarum sollempniis et aliis horis eadem die sollempniter celebrandis interfuerint tunc presentes Insuper et predictus custos omnes proventus qui de eadem huba poterunt provenire inter canonicos eisdem diebus dividat tunc presentes Si autem quod absit ipsi canonici qui tunc presentes fuerint in exsecutione eorundem officiorum extiterint negligentes habebit prepositus qui tunc fuerit liberam potestatem trina tamen admonitione premissa eandem hubam sibi ac suis usibus applicandi Ad hec quamdiu vixero et eandem hubam tenuero LX denarios in die beati Corbiniani in signum ordinationis mee inter canonicos qui eodem festo matutinis vesperis et sollempnibus missarum interfuerunt decrevi de predicte hube proventibus dividendos In cujus rei testimonium presens scriptum mei et capituli duxi sigillorum munimine roborandum Acta sunt hec apud Ardaker anno domini MCCLXXXVIII decimo septimo calendas Aprilis