Charter Document - 03810018

Otacharus dei gratia Boemie rex dux Austrie Styrie et Karinthie marchioque Moravie dominus Carniole marchie Egre ac Portusnaonis vniuersis officialibus et mutnariis qui pro tempore fuerint in Austria instituti gratiam suam et omne bonum Zelo diuine pietatis moti ecclesie Ardacensis preposito et capitulo eiusdem in restaurum et reconpensationem dampnorum que olim ab hominibus ducis Bavarie ipsa ecclesia pertulit in ornamentis libris calicibus et priuilegiis quibus eadem ecclesia tunc temporis habundabat hanc duximus gratiam de nostra regia munificencia liberaliter concedendam vt iura et libertates quibus est gauisa temporibus predecessorum nostrorum ducum Austrie clare memorie habeat et eisdem regni nostri temporibus plene gaudeat Eo quod nos illas ecclesie preposito et capitulo memorato obseruare uolumus et ab omnibus aliis inuiolabiliter obseruari propter quod vobis uniuersis et singulis damus firmius in mandatis et nostre gratie per obtentum quatenus nullus uestrum prefatos ecclesiam prepositum et capitulum audeat uel presumat in suis juribus seu libertatibus ipsis factis aliqualiter perturbare sed ipsos ac eorum procuratores cum vino victualibus seu rebus aliis sursum et infra per aquas et terras pro eorum utilitatibus conducendis permittatis transire libere sine muta Quicunque vero ex vobis predictos scilicet ecclesiam prepositum et capitulum contra huius inhibitionis nostre mandatum presumpserit impedire in illum tamquam mandatorum nostrorum temerarium contemptorem animaduersionis nostre acrimoniam taliter conuertemus quod aliis cedere poterit in exemplum et ut premissa robur obtineant firmitatis ipsis preposito et capitulo presentes litteras scribi fecimus nostrorum sigillorum munimine roboratas Datum in Znoyma anno domini millesimo CCLXXIII quintodecimo Calendas Julii