Charter Document - 03810015

Cum omnium habere memoriam et in nullo peccare lege teste non sit hominis inmo Dei vrgens necessitas et evidens utilitas id exposcit ut hominum fragili memorie scriptis et viuo testimonio satellitium prebeamus Ad notitiam igitur singulorum presentium et futurorum cupio pervenire quod ego Magister Henricus dictus de sancta Petronella canonicus Ardacensis meam aream in Ardakker propter defectum aliarum arearum diuisam et distinctam in tres areas canonicis deputatas do et lego pro remedio anime mee capitulo Ardacensi hac annexa conditione ut cuicunque canonicorum aream affectauero iam constructam magnis laboribus et expensis idem omni contradictione et excusatione cessante singulis annis in vigilia beati Michahelis archangeli solvat prefato capitulo libram unam denariorum Wiennensium usitate monete pro annua pensione qui denarii eodem die tempore misse inter presentes canonicos tantumodo dividantur et ipsi canonici pretaxato die cantatis matutinis subsequenter dicant vigilias mortuorum et similiter ea die missas celebrent pro defunctis Adicio etiam si prefatus canonicus admonitione premissa forsitan malitiose vel contumaciter statuto tempore solvere neglexerit huiusmodi pensionem ex tunc prefata domus redeat ad capitulum pleno iure ipsumque capitulum alteri canonico quem ad hoc elegerit eandem domum locandi liberam habeat potestatem Volo etiam ut canonici eandem domum inhabitantes nomine capituli habeant potestatem ipsam aliis canonicis affectandi premissis omnibus condicionibus poena et iuribus observatis et ut huiusmodi pensio commodius persolvatur eidem aree annecto hubam in Reinswidel quam multis expensis ad ecclesiam revocavi feodali titulo a laycis occupatam et pratum meum in Tanwisen Sane de secunda area adiacenti per sepem pomarii distincta sic ordino et dispono ut cuique canonicorum eandem affectavero singulis annis in vigilia beati Martini persolvat quinque solidos usualis monete decano nomine capituli ut idem decanus ordinet luminaria ante altare sancti Petri de sepo a festo Martini usque ad annunciacionem deinde lampas accendatur oleo per estatem Si vero decanus et capitulum in huiusmodi ordinatione fuerint negligentes tunc prepositus alteri canonico committendi habeat potestatem provisionem huiusmodi ne per anni spatium pereant luminaria Si vero idem canonicus negligens exstiterit in solvendo censum predictum admonicione premissa domus redeat ad capitulum pleno iure Ut autem census huiusmodi facilius persolvatur annecto decimam meam in Winklarn aree prelibate De tercia autem area inferiori sic ordino ut cuique ipsam affectavero singulis annis inde persolvat tres solidos Wiennenses in vigilia Nicolay qui denarii sunt inter presentes tantum dividendi et missa dicatur pro defunctis mea habita intencione et ut levius eadem pensio persolvatur annecto decimam meam in Ellinge aree prenotate Ceterum de huba mea in Marchstain que fuerat alienata quasi perpetuo ab ecclesia titulo feodali et quam interveniente mea pecunia liberavi a nexibus laycorum sic ordino et dispono ut ceteris hubis Ardacensis ecclesie ascribatur et ejusdem pensio in communes usus omnium canonicorum post meum obitum redigatur