Charter Document - 03810010

In nomine sancte et indiuidue trinitatis Marquardus Walthusensis prepositus et Hartmannus Ardacensis prepositus cum uniuersitate subjectorum omnibus qui fide et nomine christiano censentur salutem in uero salutari Cum oborte lites non ea facilitate sopiantur qua solent emergere que suos etiam auctores raro fore sinunt indempnes maiori cum semper ad conpositionis festinandum est remedium Quocirca consideratione habita de modo controuersie inter duas ecclesias nostras Walthusensem videlicet et Ardacensem super parrochia Niwenstat cum multe hinc inde incassum fierent expense ac graues inminerent labores ad hunc finem tandem uenire decreuimus ut consentientes in arbitros quinque uiros idoneos eligeremus Perengerum decanum Ebergerum custodem de choro Ardacensi Gotschalcum camerarium Herrandum cellerarium de Walthusensi collegio nec non uenerande discretionis uirum Vlricum decanum de sancta Agatha quibus decidende litis arbitrium conmitteremus Vt autem factum quod uniuersitatem tangebat ab uniuersitate approbaretur datis et acceptis uicissim litteris de rato ab utroque conuentu amplius non obligauimus scilicet cautione fidei et poena centum librarum Wiennensis monete ita ut quicquid prefati arbitri de sepe mota controuersia ordinarent firmum et inconuulsum stabili iure maneret Illi ergo uti compromissum in eos fuerat de causa cognituri conuenerunt et uisis utriusque partis instrumentis et cause meritum intuentes non de motu proprio ut estimare possunius immo animo diuino instructi consilio litem perpetuo fine claudere curarunt statuentes in primo ut facta renunciatione de instrumentis utriusque partis super his habitis et habendis Walthusen ob diuturnam possessionem licet fide ac titulo dubitato de cetero sicut prius in pretaxata parrochia cum solita et annua pensione Niwenstat habeat Verum quia sepe dicta ecclesia Niwenstat in terminis Ardacensium uidebatur existere censuerunt ut prepositus et canonici in Ardacher eligant unum de choro suo pro quocunque petere uoluerint qui in canonica faciat residentiam quem Walthusiensis prepositus absque contradictione representabit domino Pataviensi episcopo in eadem parrochia inuestiendum qui pensionem debitam et annuam videlicet XX modios siliginis et totidem avene antique et consuete metrete claustri cum omni iure pristino sub poena collati sibi beneficii ante festum sancti Martini Walthusiensi ecclesie persoluat et in diebus rogationum cum plebe eiusdem ecclesie Walthusen ueniat cereum sicut consuetum est secum deferendo Itemque annexum est ut si forte dissensio inter prepositum de Ardacher et eius conuentum de petenda persona facta fuerit nec infra mensem concordauerint in arbitrio sit Walthusiensis prepositi conferendi iam dictam ecclesiam cuicunque voluerit de choro Ardacensi residentiam in canonica facienti iterumque ius petendi ad prepositum et conuentum de Ardacher sicut pretaxatum est redeat nisi similis casus interuenerit Preterea statutum est ut clericus institutus si statuto tempore post trinam ammonitionem pensionem debitam non soluerit aut si forte ad maiorem promotus fuerit ecclesiam seu quacunque rationabili causa prebenda illum priuari contigerit consequenter memorata careat ecclesia et alteri residenti canonico predicto modo conferatur Arbitratum est etiam ut decedente canonico plebano sepe dicte ecclesie nec prepositus de Walthusen nec prepositus de Ardacher maiuns ad reliquias mittere presumat decedentis sed successori illese conseruentur qui de eisdem reliquiis taxatam pensionem Walthusiensi ecclesie si nondum fuerit exhibita teneatur persoluere Porro ne procedente tempore quispiam successorum nostrorum presentis arbitrii contractum audeat infringere et inmutare sic inhibemus uiolati pacti reum solutione centum librarum Wiennensis monete decernentes condempnandum Et ut hoc factum nostrum ex omni parte auctorabile robur habeat utriusque conuentus Walthusensis et Ardacensis impressione sigilli confirmamus Acta sunt hec anno ab incarnatione domini millesimo ducentesimo decimo quinto aput Grine in domo iudicis in presentia testium quorum nomina sunt hec Reinhardus et magister Heinricus canonici Ardacenses Rugerus plebanus in Chreucen Hermannus presbiter in Niwenstat Heinricus de Mitterchirchen Vlricus de Ibenperge Vlricus iunior de Imzingen Fridericus de Chlengrube Hermannus Gerhardus Rugerus Marquardus Chazze burgenses in Grine Heinricus de Chreuzpach Richgerus de Ozenstein Dietricus Indote De familia Ardacensi Vlricus officiarius Heinricus preco Otto de Avwa Otto aput riuum Albertus de Chalmunzpach Chunrat Heftlinc Preterea utrique parti placuit presentem paginam dominorum nostrorum videlicet Pataviensis et Frisingensis episcopi sigillo ad maiorem firmitatem sorciendam debere roborari