Charter Document - 03790609

S[tephanus] dei gratia rex Angl[orum] et dux Norm[annorum] H[ugoni] Roth[omagensi] [archiepiscopo et] episcopis abbatibus comitibus baronibus vicecomitibus et omnibus in Norm[annia] commorantibus tam futuris quam presentibus salutem Quoniam altissimus dominatur in regno hominum et cui voluerit dabit illud pro eius honore et mea salute consilio et assensu principum et fidelium meorum statui et firmavi tibi Hugoni archiepiscopo tuisque successoribus et omnibus episcopis Norm[annie] jura omnia episcopalia et synodalia reddi Et de his qui treviam Dei infringunt et in treviam Domini homines occidunt similiter statui quemadmodum rex H[enricus] avunculus meus teneri mandavit videlicet si occisorem in trevia Domini aliquis duello probare voluerit duellum illud in curia mea erit et si occisor ille convictus fuerit episcopus in cuius diocesi treviam Dei infregit emendam suam id est ix libras de rebus convicti justicia meo cogente primum habebit Si vero res convicti non suffecerint ad faciendas illas ix libras quicquid ibi minus fuerit totum illud episcopus habebit Et de rebus convicti nichil ad opus meum accipietur donec prius totam emendam suam habuerit episcopus Si vero defuerit qui occisorem in trevia Dei duello probare voluerit tunc ille occisor per ministros ecclesie vocatus aperta lege judicii aut aque vel ignis sese purgabit Et si convictus fuerit ibi de episcoporum emenda quod superius scriptum est justicia meo cogente fiat Si autem infractor trevie Dei justiciam subire noluerit simili modo emendam suam habebit episcopus cogente justicia meo Et si occisor qui fugerit postea pacem mecum fecerit pro pace mea non tolletur episcopo emenda sua sed reddet eam episcopo vel satisfaciet de ea cum eo Ego denique qui deo primum obedire debeo omnes inobedientes condempno et tam rigore gladii quam censura episcopali puniendos decerno Testibus H[enrico] episcopo Wint[oniensi] et B[ernardo] episcopo Sancti David[i] R[oberto] episcopo Baton[iensi] Willelmo Martel G de Pomeraia Apud Witheham