Charter Document - 03781874

In nomine sancte et indiuidue Trinitatis ego Henricus rex Anglie et dux Normannie pro redemptione anime mee et predecessorum meorum concessi monachis de Thyron uxore mea Adelide etiam concedente quecumque Robertus Martini filius eisdem monachis uel dedit uel daturus est quieto iure ac perpetuo possidenda sicut infra in presenti membrana subscriptum est Ego Robertus Martini filius de superna cogitans retributione uxore mea Mathildi concedente uel potius monente pro sancte ecclesie exaltatione in terra mea de Gualis Tironensium monachorum paupertati compatiens monasterium in honore sancte dei genitricis semper uirginis Marie constituens nonnullis ibi fratribus religiose conuersantibus abbatem eis preponi a domino abbate Willelmo et omni conuentu Tyronensi deo auxiliante tandem multis precibus impetraui quorum necessitatibus iuxta possibilitatis mei uires concurrere cupiens uenerando Anglorum rege Henrico adhortante ac pariter et que dedi et que daturus sum quieta ac libera iure perpetuo abbati ac eius monachis eorumque successoribus possidenda concedente scilicet nec ab ipso rege nec ab eius quolibet principe aut eorum aliquo successore dedi eis antiquam ecclesiam sancti Dogmaelis cum possessione terre eidem ecclesia adiacente cuius nomen est Landodog in prouincia Kames iuxta ripam fluminis Theui Dedi quoque eis totam terram in confinio eiusdem predicte ecclesie et loci sitam quam in dominio meo tunc tenebam cuius diuisiones iste sunt ab amne quodam cui nomen est Bruan qui in partibus illis inter Hemelyn et Cames diuidit sicut descendit in proximum flumen Theui et inde sicut idem flumen decurrit in proximum mare Item que ab eodem amne predicto uersus merediem usque ad terram Roberti de Languetch et inde secus terram Rogerii de Mathone contra occidentem donec perueniatur ad terram Willelmi filii Rogerii et inde usque ad diuisiones Hugonis cognomento Gualensis scilicet usque ad amnem qui terram ipsius et Landbloden manerium quod eorum est diuidit Omnis autem terra illa que infra diuisiones ista habetur tam uacua quam arboribus obsita monachorum est Dedi quoque eis quendam de militibus meis nomine Aleni cum terra sua que etiam intra diuisiones predictas continetur sed et in montanis quorum nomen est Breselech a terra Huberti de Vallibus usque ad ortum cuiusdam riuuli qui dicitur Combkaro atque inde donec defluat in amnem cui nomen est Cledi et inde contra eiusdem Cledi ortum donec ad modicum riuulum ascendatur qui de cacumine dextri montis descendit et inde per summitatem eiusdem montis sicut in longum distenditur donec iterum ad terram Huberti de Vallibus perueniatur monasterio iam dicto concessi Quicumque uero de meis hominibus pro remissione peccatorum suorum de terra sua eidem monasterio dederit omnino concedo Dedit denique eisdem monachis mater mea insulam Pyr que alio nomine Caldea nuncupatur quam a domino meo rege michi datam matri mee dederam quod utique libens concedo Concessi insuper illis ut in propriis nemoribus meis ubicumque porci mei pascerentur porci eorum pastum haberent et ligna ad edificanda edificia sua inde sibi absque ulla contradictione assumerent quantum uellent Dedi uero illis et piscariam sancti Dogmaelis et concessi illis ut per totam aquam quamdiu terra erum protenditur alias piscarias siue molendinum facerent siue cum sagenis piscarentur uel quicquid utilitatis fieri potest in aquis uel excogitari sibi facerent si uellent Dedi quoque illis omnium ceruorum siue bischarum qui in uenationibus meis caperentur omnia coria preter illa que ad uenatores pertinent Et in Anglia dedi eis quoddam manerium nomine Ratreu cum omnibus consuetudinibus suis Hec igitur omnia quamuis in diuersis temporibus dederim tamen in ordinatione abbatis solemniter donatio hec facta est ea die qua primus eiusdem loci abbas Fulchardus nomine a domino Bernardo Meneuensis ecclesie episcopo intronizatus in sede sua est concedente eodem episcopo quicquid de decimis meis eidem abbati dederam tam de frugibus quam de animalibus siue ouibus seu pullis equarum aut uitulis et quibuscumque pecoribus unde decimatio reddi debeat de lana de caseis ac butiro in Gualis Hec ergo data sunt IIII idus Septembris presentibus atque testificantibus eodem episcopo B[ernardo] atque domino abbate Tyronense W[illelmo] necnon et Ricardo G[ilberti] filio et Hunfredo Gosmer[i] filio et Stephano dapifero Rich[ardo] Alueredo de Benneuilla eisdem subscribentibus in hac carta Signum Henrici + regis Signum Adelidis + regine Signum + Roberti Signum + Bernardi episcopi Signum + Matill[idis] Signum + Ricardi filii G[ilberti] + Stephani + Alueredi + Hunfridi