Charter Document - 03780489

Charter Document - 03780489


Charter Number: 03780489
Cartulary Title: Regesta Henrici Primi, 1100-1135 [Westminster]
Charter Language: Latin
Charter Origin: Royal
Charter Type(s): Notification
Date: 1100
Date type: Assigned
Resource Link(s):

Charter:

Henricus dei gratia rex Anglorum archiepiscopis episcopis abbatibus comitibus uicecomitibus omnibusque baronibus et ministris suis francis et anglis per Angliam salutem Sciatis communiter me pro redemptione anime mee et patris et matris mee necnon et beate memorie regis Edwardi cognati mei qui patrem meum liberosque illius in regnum suum adoptiuos heredes instituerat accepisse in manu mea et defensione totum honorem ecclesie sancti Petri Westmonasterii In qua ecclesia ego oleo sancte unctionis sicut et ceteri ante me reges perunctus quia ille locus antiquitus regum consecrationis fuisse cognoscitur et corona regni a deo per pontificales manus celebriter coronatus sum et in cuius etiam predicte ecclesie materno utero corpus domini ac predecessoris nostri et prefati regis Edwardi refotum sepulture requie ut cernimus requiescit per quem nempe me in regimen regni Anglie sublimatum fore cognosco Inprimis itaque predictam ecclesiam ita liberam et quietam et expeditam esse uolo tam ab omni exactione episcopali quam a seculari sicut per summorum pontificum Iohannis Leonis ac Nicholai auctoritatem et per cartam regis Edwardi cognati mei necnon et Willelmi patris mei aliorumque regum constat fuisse confirmatum Liberamque electionem eiusdem ecclesie monachis abbates idoneos ex sua uel ex alia congregatione eligendi sicut illis antiquitus concessum est concedo et ne aliquis eis uim uel uiolentiam inferat uel inferre presumat potestate regia defendo Cuncta siquidem que idem monasterium a sui principio usque ad presens concessione atque oblatione fidleium optinuit uel in futurum optinebit concedendo deuotus constituo necnon et omnes donationes terrarum uel ecclesiarum uel aliarum rerum que ibi ab antecessoribus meis regibus seu a quibuscumque ante me donate sunt seu et alias quas uel ego uel optimates mei uel quilibet de ciuibus Lundonie donauerant tam terras quam consuetudines et omnia iura qualiumcumque causarum in omnibus terris et possessionibus que sunt in Lundonia uel in aliis quibuscumque locis predicto monasterio adiacent uel adiciende sunt concedo atque confirmo Huic libertati eciam additamentum dono scilicet mundbrice miskenninge sceawinge hlastinge frydhsocne flemenefyrmthe wesgeltheof uthleap forpheang wihpheang ferdwite fihtwite blodwite weardwite heangwite hamsocne forsteall infangenetheof sace socne toll et theam aliasque omnes leges et consuetudines que ad me pertinent Priuilegia itaque antiquorum regum aliorumque fidelium ibidem data ex nomine sancte Trinitatis et sanctorum omnium meaque regia potestate confirmo atque concedo et firmiter precipio ut sanctus Petrus et monachi eiusdem ecclesie bene et imperpetuum quiete et honorifice in urbe et extra et in omnibus locis teneant omnes terras suas et omnia sua libera ab omni regia consuetudine et ab omni collectione census qui geld uel danegeld seu scot Anglie nominatur Insuper eciam eos quietos clamo ab omnibus placitis et querelis et sciris et hundredis et auxiliis uicecomitum et ab omnibus rebus et occasionibus et ab omni castelli seu quocumque opere seruili et legibus et consuetudinibus que ad me pertinent Si enim placitum de murthro uel latrocinio terre sue euenerit sic placitet et in illis locis sicut carta predicti regis Edwardi testatur et precepit Similiter de omnibus aliis placitis Defendo etiam et pleniter prohibeo ne unquam grauentur ullis oneribus neque ullus eis molestus sit neque archiepiscopus uel episcopus siue comes neque uicecomes nec aliquis alius in aliquo de omnibus que ecclesie illius sunt uel de ecclesiis terrarum prefati loci se penitus intromittet nisi consensu omnium fratrum ad utilitatem ecclesie sitque hec sancta mater ecclesia peculiaris patroni nostri beati Petri libera et absoluta ab omni inuasione et inquietudine omnium hominum cuiuscumque ordinis uel potestatis sint Et ut breuiter pleniusque omnia concludam quicquid honoris quicquid quietationis uel libertatis seu etiam dignitatis prefate ecclesie et monachis ab antiquis regibus et beate memorie rege Edwardo atque patre meo ceterisque fidelibus est concessum insuper et auctoritate apostolica Romanorum predictorumque pontificum est confirmatum melius et firmius mee confirmationis dono nunc habeant Contestor autem omnes filios heredes scilicet et omnes posteros meos sicut et pater meus nos contestatus est per tremendum iudicium dei ne ipsi faciant seu fieri sinant ullam infractionem huic nostre donationi immo augeant confirment et stabiliant illam ita ut deus stabiliat dies et regnum illorum in eterna beatitudine et habeant partem in hac elemosina nobiscum in eterna requie Testibus Mauricio Lundon episcopo et Willelmo electo Wintoniensi episcopo et G[erardo] Herefordensi episcopo Henrico comite et Simone comite et Waltero Gifardo comite

Source (click image below to view full size)