Charter Document - 03770123

Quoniam ea que litteris imprimuntur firmius tenentur de terra Sancte Trinitatis que insula Oscelli vel Turhulmi dicitur placuit fidelem et compendiosam facere descriptionem et multis ac veris suffultam testimoniis utilem posteris pandere rationem Postquam enim inclitus comes Normannie et marchio Rotbertus et fidelis ejus Gozelinus vicecomes de Archis ecclesiam Sancte Trinitatis in monte Rotomagi construxerunt dedicata est ab archiepiscopo Rotberto ejusdem urbis et aliis episcopis Interfuit huic dedicationi memoratus princeps cum optimatibus suis et copiosa multitudine plebis In hoc igitur conventu prelibatus vir Gozelinus cum conjuge sua et filiis fecit donationem de suis rebus quas dedit monasterio et inter alia sui juris predia et dona insulam Oscelli que et Turhulmus dicitur Sancte Trinitati et monachis ejus jure hereditario possidendam libere et absolute tradidit presente supradicto duce Rotberto et annuente ac sue confirmationis sigillo roborante sed et cunctis qui ad dedicationem convenerant audientibus et faventibus Quam insulam domnus Isembertus primus ejusdem cenobii abbas et domnus abbas Rainerius successor ejus quandiu vixerunt absque ulla calumpnia et contradictione tenuerunt His ab hac luce subtractis domno abbate Walterio cenobium gubernante quidam Ebroice urbis episcopus nomine Gislebertus quam nemo antecessorum suorum fecerat calumpniam prefate insule Sancte Trinitatis intendit que usque ad regiam aulam pervenit Ineptum visum est regi Willelmo de illa terra alicui audientiam dare que patris sui dono tanti temporis spatio id est l annorum libera monasterii fuerat sed tamen ob reverentiam episcopalis persone placitum dedit et in sua curia fieri statuit Anno igitur dominice incarnationis millesimo LXXX in paschali solemnitate presente rege Willelmo et regina Mathilde et filiis Rotberto et Willelmo ipso rege jubente tenuerunt hoc placitum magne auctoritatis et precipue dignitatis viri tam de ecclesiastico quam seculari ordine qui tunc festivitatis gratia invitante ad curiam regis convenerant scilicet domnus Willelmus archiepiscopus Rotomagensis Ricardus archiepiscopus Bituricensis Warmundus archiepiscopus Vienne Goeffredus episcopus Constantie urbis Gislebertus episcopus Lisiacensis Rotbertus comes frater regis Rotbertus comes de Ou Wido comes Pontivensis Rogerius de Bellomonte et filii ejus Rotbertus et Henricus Rogerius de Monte Gumeri Walterius Gifardus Willelmus de Archis heres defuncti scilicet avi sui Gozelini qui prefatam terram in sule dederat Sancte Trinitati et omnes nobiliores curie regis Qui predictus Willelmus judicio placiti ad satisfaciendum episcopo et dissentionem penitus abolendam avite donationis testis processit et jurejurando confirmare paratus fuit quia ipsa die et hora qua hanc terram Sancte Trinitati ipse Gozelinus dederat libere eam et absolute sua dicione possidebat Tunc episcopo nolente sacra mentum recipere jussu regis et auctoritate est confirmatum et ab omnibus qui aderant judicibus jam superius memoratis decretum et diffinitum ut predictam insulam Oscelli que Torhulmus dicitur abbas Walterius et monachi Sancte Trinitatis exinde omni tempore libere et absolute tenerent Signum Willelmi regis Signum Mathildis regine Signum Rotberti Signum Willelmi filiorum Signum Willelmi archiepiscopi Signum Ricardi archiepiscopi Signum Warmundi archiepiscopi Signum Rotberti fratris regis Signum Widonis comitis Pontivensis