Charter Document - 03770077
| Charter Number: | 03770077 |
|---|---|
| Cartulary Title: | Regesta Willelmi Conquestoris et Willelmi Rufi, 1066-1100 [Westminster] |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1074 |
| Date type: | Internal, A.D. |
| Resource Link(s): |
Archives départementales de Seine-Maritime - 14 H 911/2 SCRIPTA - Base des actes normands médiévaux |
Charter:
Johannes Dei gratia Rotomagensis archiepiscopus universis Christi fidelibus salutem gratiam et benedictionem Notum sit omnibus modernis et futuris quod petitio Rogerii de Mortuomari et uxoris ejus Advise ad nos venit ad dominum Guillelmum regem Anglorum et ad me sedentes et tractantes de negotiis ecclesiasticis et secularibus cum episcopis in quodam concilio congregato in urbe Rotomagensi ut domnum Nicolaum abbatem S Audoeni Rotomagensis cognatum nostrum obnixe conveniremus quatinus pro amore Dei et nostri abbatiam fieri dimitteret de quodam prioratu de ecclesia S Victoris in Caux in qua habitabant monachi S Audoeni que dicitur ad S Victorem et quam ecclesiam quidam presbyter nomine Tormor de cujus jure erat ecclesie S Audoeni assensu Guillelmi tunc ducis Normannorum et Malgerii archiepiscopi Rotomagensis et Rogerii de Mortuomari in cujus feodo erat pro salute anime sue dederat in eleemosynam et in ecclesia S Audoeni monachus effectus fuerat cum quodam nutritio suo nomine Gilberto Et prefatus Rogerus concessit ut tantum reditum augeret ecclesie S Victoris et ecclesie S Audoeni ut honorifice ibi Deo monachi servire possent et eis digne sufficeret et quale dominium habuerat antea ecclesia S Audoeni in prioratu tale postea in abbatia eternaliter possideret Quum vero predictus abbas Nicolaus assensu capituli sui et rogatu nostro et amore Rogerii et uxoris sue hec concessisset Radulfum quemdam monachum suum ibi abbatem preficiens ad supradictum locum constituendum misit et cum eo de monachis suis S Audoeni Fulbertum Gislebertum Fauvetel Hubertum Treton et Guillelmum tali tamen conditione quod dominium suum S Audoeno in domo S Victoris nullo modo minueretur sed ibi poneret abbatem alio defuncto sicut priorem ponere solebat salva dignitate S Audoeni Hoc enim constitutum est inter nos ratum et firmum esse in perpetuum cujus rei testes sumus ex utraque parte Si enim in disponendo abbate monachi vel laici rebelles ecclesie S Audoeni fuerint statuimus et firmiter precipimus Guillelmus rex et ego Johannes Rotomagensis archiepiscopus et Rogerus de Mortuomari in quorum presentia hoc factum fuit auctoritate domini pape Gregorii et regia potestate omnibus heredibus et successoribus nostris ut abbas S Audoeni accipiat ecclesiam prioratus sui S Victoris cum omnibus appenditiis suis tunc ibi inventis in ecclesiis in decimis et aliis substantiis et ponat priorem in ecclesia illa sicut antea solebat ne ecclesia S Audoeni pro liberalitate sua detrimentum patiatur fraude et dolo quam antecessores nostri pro salute animarum suarum fundaverunt Hanc conventionem auctoritate nostra ab abbate Nicolao et Rogero de Mortuomari concessam coram rege ratam esse statuimus et presentis scripti privilegio et sigilli nostri auctoritate confirmavimus et prohibuimus ego Johannes Rotomagensis archiepiscopus sub anathemate ne quis ulterius clericus vel laicus audeat hoc infringere presentibus istis episcopis et mecum excommunicantibus Gisleberto Ebroicensi episcopo Odone Bajocensi Hugone Lexoviensi Roberto Sagiensi quorum anathemate omnes fractores hujus operis confodiantur Prefatus autem rex Anglorum Guillelmus prohibuit sub forisfactura XX unciarum auri reddendarum duci Normannie et XX librarum Rotomagensi archiepiscopo ne ab aliquo infringatur testibus predictis episcopis et Fulberto archidiacono et Rogero de Mortuomari et quorum presentia hoc factum fuit anno ab Incarnatione Domini MLXXIV