Charter Document - 03741095

Nos Othes comes palatins de Bourgongne et sires de Salins facons sauoir a touz Que li emglise de Chastel sur Salins les personnes et tote li terre et li mambre de celi sont en nostre bone garde Et dauons les personnes les biens et les homes de la dite emglise garder en tel maniere que nos ne dauons ne poons panre en garde nuls des homes de la dite emglise de Chastel ne entrer de nouel en droit en jurisdictions en possessions ou ens prieres diceli contre la volenté dou priour de Chastel qui or y est ou qui y serai ne aidier ne defendre ne maintenir les homes de la dite emglise contre lou priour dou dit leu Aincois volons que li priours qui y est et cil qui apres lui y saront se joient et esplaitoient de leur homes en quelque leu quil soient en notres fins et au destroit de nostre contey de Bourgongne et de la seignorie de Salins et autre part Et deffendons a touz nos bailliz Chasteleins maiours et sergenz et aus autres nos officiaus et subgiez qui y sont et saront ou tamps a auenir quil au priour de la dite emglise qui or y est et a cels qui y saront ne empaichoient ou destorboient contre li diz priours et sui successours ne sesplaitoient de leur homes et de leur biens En tesmoignaige des quels choses dessus dites Nos auons baillies au priour de Chastel ces lettres saelées de nostre scal Données en Bracon le mercredy devant feste saint Barnabé lapostre l'an de grace mil dous cenz nonante trois