Charter Document - 03740070

Nos Jahans euens de Borgone et Sires de Salins Nos Amers Sires de Colonie Nos Ponz priors de Gignie Nos Hues de Rogemont mestre du Temple en Borgone faisons sauoir à toz cex qui cestes presentes lettres verront orront que mes sires Manassers de Cologni establis en nostre presence reconnut dist que la vile de Montagni et totes les appendices de Montagni estoient liges à la Maison dou Temple bois plen pré champ toz li terrages de Sainte Fontaine liges dou Temple bois plen et pré champ la terce partie dou terrage d'Espernie bois plen pré champ la vile de Broissie deis l'aigue de Suren tant que a la terre de Montagni qui fu donc d'aumosne quant li diz Manassers fu renduz au Temple Nos Amers sires de Coligni donames otreames ladite aumosne por nostre frere Manasser Apres ceste reconnoissance nos comandames que les dites terres fussent aquiées par devant nous liquel aquiement furent fet en tel maniere que Colons d'Esvenx jurés dit que la terre de Montagni dure deis for Richar tant que superer qui est entre le cham de Colognie le terrage d'Espernie qui est desoz le chemin deis l'aigue de Meirin tant que au pomer à la deschaucé tant que au fo Ferre qui est devers Faverges deis l'aigue de Meirin envers venz tot droit si comme ele porte contremont vers Faverges tant comme aigue pent vers Sainte Fontaine deis le chasne de Rissié tant que à la dois de la fontaine de Malpertuis tant que au chasne dou Repossot tant que au soil du molar de Sant Muris devers venz tant que a for Richar deis en [] tot droit tant que a fo Ferré devers Lancetes Dou terrage de Sante Fontaine dist que il dure deis fo Ferré tant à l'aigue de Meirin tant comme aigue pent vers Sante Fonteine Vuchars doriolet Haymes li clers de Sant Julien Vullames Putoudaz Lambers Butisac Berars des Crues Robers Jalers Haymes Aubespins Parins juré dislrent ce mame que Colons por totes choses En tesmoig de ceste reconnoissance de cest aguiage pour la priere de l'une de l'autre partie nos auons mis nostres scex en cestes presentes lettres en tesmoig de vérité en l'an de l'encarnation nostre Segnor qui adoncques coroit por MCCXXVIJ