Charter Document - 03740045
| Charter Number: | 03740045 |
|---|---|
| Cartulary Title: | Histoire de Gigny |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 0974 |
| Date type: | Internal, A.D. |
| Resource Link(s): |
|
Charter:
Omnipotentis Dei amplissima largitas consuluit humane fragilitati ut ex perituris non peritura ex labentibus non labentia acquirere possint homines moribundi Idcirco ego Manasses comes considerans causam fragilitatis humane simulque recordans sententiam Domini dicentis Date eleemosynam et omnia munda sunt vobis itemque Redemptio anime viri divitie ejus ut pius et misericors Dominus de immanitate facinorum meorum me absolvere dignetur tam pro me ipso quam pro genitore meo Manasse comite et Judita matre mea et uxore mea Gerberga et filiis meis Cedo Domino Deo et principibus apostolorum Petro et Paulo et ad locum Ginniacum qui regitur sub gubernatione Domini Maioli abbatis ecclesias Tresfortium Marbosium et Cabrellum sitas in pago Reversimontis cum omnibus decimis et donariis sive oblationibus vel sepulturis cum campis pratis aquis aquarum decursibus appendiciis et omnibus ad ipsum pertinentibus totum et ab integro sine ulla controversia Sane si quis hanc donationem contradicere presumpserit iram Dei omnipotentis incurrat et sanctorum omnium nisi ad satisfactionem et emendationem venerit et convictus componat de auro solidos mille Et hec donatio firma permaneat et stabili stipulatione subnixa Signum Manassis comitis Signum Gerberge comitisse uxoris ejus Signum Manassis eorum filii Signum Walaci filii eorum Signum Richardi filii eorum Facta est hec donatio mense Augusto apud Castrum quod vocatur Coloniacum anno incarnationis Dominice DCCCCLXXIV Indict II regnante Conrado rege