Charter Document - 03720227
| Charter Number: | 03720227 |
|---|---|
| Cartulary Title: | Charters of Worcester |
| Charter Language: | English |
| Charter Origin: | Lay |
| Charter Type(s): | Grant |
| Date: | 1052 - 1057 |
| Date type: | Assigned |
| Resource Link(s): |
Anglo Saxon Charters (S 1232) British Library - Cotton MS Tiberius A XIII (f183r) eSawyer (S 1232) |
Charter:
Px Her swutelað on ðissum gewrite þæt Leofric eorl and his gebedda habbað geunnen twa land for Godes lufan and for hyra sawle into þære halgan stowe sancta Marian mynstre at Wihgraceastre þam gebroðran to bryce inn to heora beodderne þe þær dæighwamlice Gode þeowiað to þam foreweardan þæt þa gebroðra beon þingiende for uncrum saulum þæt synd v hida landes at Wulfweardiglea and twa at Blacawyllan and ænne hagan on porte þæt hit sig æfre into heora beodderne freols and hit nan man ne geutige and gyf ænig sy þe hit mid ænigan þingan geecean wylle oððe godian God ælmihtig him geunne gesundfull lif and ece mede and gyf ænig þonne sy up ahafen and swa swiðe gredig þissere worulde þæt þas ure sylena geutian wylle hæbbe he her on ðisse life Godes curs and sancta Marian and sancte Oswaldes and eal[ra] gehadedra manna and sy he amansumod on domes dæige toforan drihtnes cneowan fram Gode and fram eallan his halgan and mid Iudan and his geferan æfre on ece wite cwylmed butan he geswice and to rihte gecyrre and wit synd þisra landa hald and mund into þam halgan mynstre þa hwile þe uncker lif bið