Charter Document - 03720224

In nomine domini [] Her swutelað on ðissum gewrite þæt Ealdred bisceop hæfð geunnen Æþestane fættan sumne dæl landes þæt synd twa hida mid þam þe he ær hæfde and mid þam hrofleasan lande and he hig eac werige for twa hida to þam foreweardum þæt he hit hæbbe and well bruce his dæg and æfter his dæge twam yrfeweardum þam þe him betst to gearnian wylle and þiss land is on þam tune þe fram cuðum mannum Hylle is gehaten and æfter þissera þreora manna forþfore gange þæt land est into Wigeraceastre to þam þingan þe se wylle þe þonne bisceopes wealde butan ælcan wiþercwyde and þiss wæs gedon be Eadwardes cynges leafe and be his fullan unnan and þisses is to gewitnysse eall se hired on Wigeraceastre and Manni abbot and se hired on Eofeshamme and Ælfric abbot and se hired on Persceoran and Leofric eorl and Odda and Ælfric his broþor and Byrhtric Ælfgares sunu and Æglric þæs bisceopes broþer and Leofric and Owine and Wagan and Atsur and Ceolmær and Ordwig and Wulfric and Ælfric at Cumbrintune and Godric finc and Berhtwine and Cola and ealle þa þegnas on Wigeraceastrescire denisce and englisce and sy þiss land ælces þinges freols butan weallgeweorce and brygcgeweorce and ferosocne and ciricsceatte God ælmihtig þone gehealde þe þiss gehealde and se þe hit awende oððe on ænigum þingum gewanige hæbbe him wiþ God sylfne gemæne butan he geswice and to rihte gecerre