Charter Document - 03720209
| Charter Number: | 03720209 |
|---|---|
| Cartulary Title: | Charters of Worcester |
| Charter Language: | English |
| Charter Origin: | Religious |
| Charter Type(s): | Lease |
| Date: | 0990 |
| Date type: | Assigned |
| Resource Link(s): |
eSawyer (S 1362) |
Charter:
In usses drihtnes noman hælendes Cristes Ic Oswald arcebisceop mid geþafunge and leafe þæs arwurðan hyredes on Wiogernacastre ge iunges ge ealdes gebocige sumne dæl landes minan holdan and getriowan men þæm is Æþelmær nama on twam stowum twega hida landes on þreora manna dæg ane hide on Cumtune on his hamstealle and healf þone wudu þærto and oþre on Mersce for his eadmodre hyrsumnysse and for his licweorðan feo þæt is twa pund merehwites seolfres and xxx euwna mid hiora lambum and iiii oxan and twa cy and an hors þæt is þæt hæbbe and wel bruce his dæg and æfter his dæge twam erfeweardan þam þe him leofest sy and him to geearnian wylle and hio hit hæbben tofrion ælces þinges butan wealgeworce and brygcgeweorce and ferdsocne þis synd þære anre hide landgemæru on Mersce ærest of Æþestanes gemære to þam wylle on Biles hamme þonne ut to þam middel ge[m]are þis wæs gedon þy geare þe wæs agan fram Cristes gebyrdtide nigon hund wintra and hundnigontig wintra on þara broðra gewitnysse þe hiora naman her beneoðan awritene and standað + Ic Oswald arcebiscop mid Cristes rode tacne þas sylene gefæstnode + Æþelstan primus + Ælfsige presbiter + Eadgar presbiter + Wistan presbiter + Æþelsige presbiter + Æþelstan presbiter + Godingc diaconus + Leofstan diaconus + Wulfweard diaconus + Æþelric diaconus + Cyneþen clericus + Wulfgar clericus + Leofwine mon + Wulfric clericus + Wulfnoð clericus + Wulfwine clericus + and Ic gean him þæs worðiges at Brynes hamme þe Æþelm ahte and þæs croftes þærto be eastan þære stræte on þæt ilce gerad þe þis oðer is