Charter Document - 03720201
| Charter Number: | 03720201 |
|---|---|
| Cartulary Title: | Charters of Worcester |
| Charter Language: | English |
| Charter Origin: | Religious |
| Charter Type(s): | Lease |
| Date: | 0987 |
| Date type: | Assigned |
| Resource Link(s): |
eSawyer (S 1369) |
Charter:
Px Ic Osuuald þur Godes giefe arcebisceop mid geþafunge and leafe Æþelredes Angulcyningces and Ælfrices aldermannes and þæs heorodes at Wygernecastre landes sumne dæl þæt syndon iii hida at Bradingccotan and an gyrd at Genenofre mon cweð sumum preoste þam is Godingc noma mid allum þingum þe þarto belimpað freolice his dæg forgeaf and æfter his dæge twam yrfweardum þæm þe he sylf wille and æfter heora forðsiðe to þære hal[g]an stowe into Wygernecastre þæm biscope to bryce and þærto Ic him sylle vii æcras mædue on þæm homme þe gebyrað into Tidbrihtingctune feorþe halfne on anum stede and feorðe halfne an oþrum stede alswa hit to gedale gebyrað Eac we writað him þone hagan þe he hæfð beforan þæm gete and twam yrfweardum æfter his dæge Þis sindon þæra þreora hida landgemæru to Bradingccotan þæt is þonne ærest of calawan hylle on foreweardan þære aldan dic andlang þære aldan dic to þære mære stowe of þære mære stowe þæt in þa dic andlang þære dic þæt to þære saltstræte swa west ofer þære stræte in þa hegestowe to Spæchæme gemære of Spæchæme gemære be westan oxnaleage be þæm hliþe of oxna leage norð in þa hegestowe andlang þære hegestowe to þæm fulan slo of þæm fulan slo in þa dic of þære dic to wynne mæduan be þære stræt andlang stræte þæt to þæm lytlan hylle of þæm hylle þæt swa be þæm iiii þornan of þæm þornan be þæm heafdon to þæm þornihtan heafodlonde of þæm heafodlonde to þære hegestowe andlang þære hegestowe to Huniburnan andlang Huniburnan to þære dic of þære dic to þæm lytlan slo of þæm slo to þære aldan dic andlang þære dic to þæm hæþe foreweardan swa suð andlang þære lytlan dic þæt þonne westweard ofer þone hæð to þæm lytlan grafe of þæm grafe suðweard beastan þæm wulfseaðe andlang þære stige þæt est to calawan hylle to þære dic foreweardan Sit autem terra illa libera ab omni secularis rei neg[o]tio præter pontis et arcis restaurationem et contra hostes expeditionem Sancta Maria et sanctus Michahel cum sancto Petro et allum Godes halgum gemiltien þis halde[n]dum gief hwa butan gewrihtum hit abrecan wille hæbbe him wid God gemæne on þam ytemestan d[æg] þisses lifes buton he ær to dædbote gecyrre + Ðis is seo hondseten + Oswold arcebisceop + Ego Æþelstan presbiter + Ego Ælfsige presbiter + Ego Eadgar presbiter + Ego Wistan presbiter + Ego Æþelsige presbiter + Ego Leofstan diaconus + Ego Æþeric diaconus + Ego Wulfward diaconus + Ego Æþelstan presbiter + Ego Kyneþeng clericus + Ego Wulfgar clericus + Ego Osuui clericus + Ego Leofwine clericus + Ego Wulfric clericus + Ego Wulnoð clericus + Ego Wulfwine clericus