Charter Document - 03720127
| Charter Number: | 03720127 |
|---|---|
| Cartulary Title: | Charters of Worcester |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 0922 |
| Date type: | Internal, A.D. |
| Resource Link(s): |
Anglo Saxon Charters (S 1289) eSawyer (S 1289) |
Charter:
Disponente regi regum cuncta cæli secreta nec non que sub cæli culmine apud homines notantur miro ordine gubernante cujus incarnationis humanæ anno DCCCCXXII indictione x hæc donatio que in ista cartula saxonicis sermonibus apparet confirmata ac donata erat In usses dryhtnes noman hælendes Cristes Ic Wilfrið biscop cyðu minum æfterfylgendum ðæt ic sylle sumne dæl londes at Clifforda higen to hiora biode at Weogernacastre on ece erfeweardnesse mid monnum and mid allum þæm nytnessum ge on fixnoðum ge on medwum ðe ðærto belympað on ðæt gerad þæt min gemynd for Gode mid him þy fæstlicor sio and hio ælce gere of ðæm londe ec be sumum dælæ gemyndgien ða tide mines forðsiðes mid ðæm nytnessum ðe hio on ðæm londe begeten and nu we halgsiað ðurh Godes mildhiortnesse alle ure æfterfylgend godcundra hada and weorldcundra þæt þios ure sylene staðulfæstlice ðurhwunian mote and gif ænges hades mon sio ure æfterfylgendra swa wemne wircað þæt ðæs ure sylene on ængum wisum gewemman oððe gewanian wille wite he hine riht ageldendne beforan Gode in ðæm forhtigendlican domes dæge butan he hit ær Gode and monnum wyrðlice gebete þisses londes siond twa hida binnan ðissum gemærum ærust up of Sture suð onlong dic[es] on ðone herpað onlong herpaðes to Westtunniga gemære swa onlong gemæres norð þæt in Afene up onlong Afene est on Sture in ða dic