Charter Document - 03720124
| Charter Number: | 03720124 |
|---|---|
| Cartulary Title: | Charters of Worcester |
| Charter Language: | English |
| Charter Origin: | Religious |
| Charter Type(s): | Settlement |
| Date: | 0903 |
| Date type: | Assigned |
| Resource Link(s): |
Anglo Saxon Charters (S 1446) British Library - Cotton MS Tiberius A XIII (f56r) eSawyer (S 1446) |
Charter:
In usses Dryhtnes naman Hælendes Cristes Ic Werferð bisceop cyðe swa me Alchun bisceop sægde and eac mine gewrytu wisodon þæt Mired bisceop gesealde Eanbalde þæt land at Soppanbyrg mid þis bebode and seoððan Eanbald hit sealde Eastmunde and him bebead Mired bisceop bebod on Godes ealmihtiges noman and on þære halgan þrinesse þæt ða hwile þe ænig man wære on hira mægðe þe godcundes hades beon walde and þæs wyrðe wære þæt he þonne fenge to þam lande at Soppanbyrg gif hit ðonne hwæt elles geselde þæt hit næfre on lædu hand ne wende ac hit seoððan eode to þam bisceopstole to Weogornacastre for heora ealra saule Ond he þa Eastmund ær his ende bebead on þæs lifgendan Godes noman þam men þe to þam lande fenge þæt he þonne on þa ilcan wisan to fenge þe Mired bisceop bebead gif he þonne to þan gedyrstig wære þæt he þæt abræce þæt he wiste hine scyldigne beforan Godes heahsetle at þam miclan dome Þa æfter Eastmundes forðsiðe bereafode seo mægð þæs ilcan londes ge þa gastas þara forðgewitenra manna ge þone bisceop and þa cirecean at Weogornacastre and Heaberht bisceop oft þæs myngode oððe þæs landes bæd and seoððan Alchun bisceop foroft þa hwile þe he wæs and eac ic Werferð bisceop oft his bæd and we ne mihton to nanum rihte becuman ær Æðelred wæs Myrcna hlaford Þa gesamnode he Mercna weotan to Saltwic ymbe mænigfealde þearfe ge Godes dæles ge worolde dæles þa spræc ic on þa magas mid þy erfegewrite and wilnade me rihtes Þa beweddode me Eadnoð me and Ælfred and Ælfstan þæt hio oðer þara dydon oððe hit me ageafon oððe on hira mægðe þone man funden þe to þam hade fenge and to lande and me wære gehearsum for Gode and for worolde Þa Eadnoð þe þæt land hæfde gebead hit ealre þære mægðe hwæðer hit ænig swa gegan wolde þa wæs ælc þæs wordes þæt him leofre wære þæt he þæt land foreode þonne he þæne had underfenge Þa gesohte he Æðelred and Æðelflæde and eac Æðelnoð urne ealra freond and heo ealle to me wilnodon þæt ic hine læte at me þæt land begeotan him to agenre æhte swelcum erfeweardum to syllenne swelce he wolde and ic þa swa dyde ealles swyðost for hiora bene and he eac me gesealde feowertig mancesa and ic þa mid mira higna leafe at Weogornacastre him sealde þæt lond on ece erfe and þa bec and þæt Eastmundes erfegewrit and eac ure agen rædengewrit þæt wære him to þam gerade þæt land to læten þe mon ælce gere gesylle fiftene scillingas clænes feos to Tettanbyrg þam bisceope and him eac þone scrift healde Ond ic Eadnoð eac beode minum erfeweardum on Godes ælmihtiges naman þæt heo næfre þis feoh gelitliæn ah sien a þæm bisceope mid rihte holde and þære heorædene at Weogornacastre God ælmihtig þa gehealde for bæm lifum þe unne þæt þeos gerædnis stondon mote in ecnesse and þis syndon þara manna naman þe at þære rednisse wæron and at gewitnysse þe her beneoðan awritene syndon + Ic Wærferð bisceop mid minre agenre handa þas sylene getrimme and gefæstnie + Beornferð presbiter + Werfrið presbiter + Berhthun presbiter + Tidbald presbiter + Berhthelm + Wigheard + Wulfred + Cynehelm + Wulfhun + Eardwulf + Beornferð