Charter Document - 03720122

In usses Dryhtnes noman Hælendes Cristes ic Werfriþ biscop mid alles ðæs heoredes leafe on Weogornacastre ge gunges ge aldes selle Cyneswiþe mire megan ðreora hida lond on Alhmundingtune ðaes fif hida ðe higen me gebocedan aer on ðreora monna dæg Nu gewrite ic hit est hire mid hina leafe ðaet ðreora hida lond on ðreora monna daeg and heo hæbbe ða wuduraeddenne in ðæm wuda ðe ða ceorlas brucaþ and ec ic hire lete to ðaet ceorla graf to sundran and elles ðæt twega hida lond and ða ceorlas and se Alhmunding snaed here into Preosdabyrig ða hwile hit unagaen seo Ond Cyneswið hit to nængum oþrum men ne lete ða hwile hit unagæn se butun to hire bearna sumum swa hweolcum swa heo ðonne wille gif heo lifigen gif heo ðonne ne lifigen lete hit to sweolcum hire mega swelce hit hire to geearnigan wille Ond ic Werfrið biscop biddu and halsigu ðæt ðis ðreora hida lond and ec ðæt twega ðonne hit agæn seo ðæt hit se agefen into Clife to ðæm biscoprice butan eghweolcum wiðercwide Ond ec ic Werfriþ biscop and all higen halsigaþ usse æterfylgend ðæt heora nænig ðas gefe gewonige aer hit swa agæn se swa hit on ðissum gewrite stondeþ and all higen eodan to minum bure on Weogornacastre and me saldan heora hondsetene ðisse geraednesse ðara noman her beneoþan awriten stondaþ and heo hit haebben eghwæs to freon butun agefen elce gere ðreo mittan hwætes to ciricsceatte to Clife + Werfriþ Episc + Cynhel abb + Werfrið presbiter + Ecfriþ presbiter + Wighard + Berhþelm + Eardwulf + Wulfred + Berhþelm + Cynah + Eamberht + Wullaf + Cynhelm + Cenfriþ + Cynhelm + Heahred + Wulfgar + Eardwulf + Cynelaf + Wigfriþ + Wulfric + Ceolhelm