Charter Document - 03720121

+ Þis is Wulfgates gecwide æt Dunnintune þæt is þonne þæt he geann ærest gode his sawelscættas þæt is i hid æt Tærdebicgan and i pund penega and vi and twentig freotmonna for his sawle and into Wigeracæstre an bryþen mealtes healf of Dunnintune healf of Cylleshale and into sancte Æþelbrihte healfes pundes weorð and into sancte Guðlace healfes pundes weorð and into Leomynstre iiii aldhryðra and into Bromgearde i hryðer oðer into Cliftune and into Heantune iiii hryðra and to Pencric ii hryðra and into Tweongan ii hryðra and he geann forgifnesse ælcan þara þe wið hine agylt hæbbe for his sawle þearfe and he geann anes geares gafol his monnum to gyfe swa heo þa are brucon swa heo þa ælmessan gelæstan þa ðer to londe foð and he geann his hlaforde ii hors and ii sweord and iiii scyldas and iiii spera and x mæran mid x coltan and he bit his hlaford for godes lufan þæt he beo his wifes freond and his dohter and he ann his wife þæs landes æt Cylleshale and æt Eowniglade and æt Hrodene þa hwile hire dæg beo and ofer hire dæg ga þæt land eft in min cynn þa ðær nehste syn and Wulfgyfe minre dohter þæt land æt Dunnintune swa hit stont and æt Þornbyrig þæt land þe wæs mid hire moder golde geboht æt Leofnoðe and Wulfgyfe suna mire dohter þæt land æt Ingewyrðe and Wilflede minre dohter þa oðre hide æt Tærdebicgan and Ælfilde mire magan þa hide beneoþan wuda eall swa wit on wedd gesealdon and gif ic lengc beo þonne heo þonne hæbbe ic þæt land æt Wrotteslea and ealle þa ðe to mire ahte fon gylde Brune xx mancses goldes and ic geann him vi mæran mid vi coltan to þance and þa hors þa þe þær to hlafe beon mine wife and minre dohtran eallum gelice fela and þeo wellinc æt þære wic into Dunnintune and Æþelsige leof cyð þis mine hlaforde and ealle mine freondum