Charter Document - 03720120
| Charter Number: | 03720120 |
|---|---|
| Cartulary Title: | Charters of Worcester |
| Charter Language: | English |
| Charter Origin: | Religious |
| Charter Type(s): | Record |
| Date: | 1010 - 1023 |
| Date type: | Assigned |
| Resource Link(s): |
Anglo Saxon Charters (S 1460) British Library - Cotton Ch VIII 37 (f1r) eSawyer (S 1460) |
Charter:
Her swutelað on ðissum gewrite [þæt] Æþelstan bisceop gebohte æt Leofrice æt Blacewellan fif hide landes æt Intebyrgan be Æþelredes cynges leafe and be Ælfeges arcebisceopes gewitnesse and be Wulfstanes Arcebisceopes and be ealra þæra witena þe ða on Englalande lifes wæron mid ten pundan reodes goldes and hwites seolfres unforboden and unbesacan to geofene and to syllanne ær dæge and æfter dæge sibban oððe fremdan þær him leofost wære and Se cyng het þone arcebisceop Wulfstan þærto boc settan and Æþelstane bisceope boc and land betæcan unnendere heortan Þa æfter þysan manegum gearum soc Wulfstan and his sunu Wulfric on sum þæt land þa ferde se bisceop to sciregemote to Wigeranceastre and draf þær his spræce þa sealde Leofwine ealdor[m]an and Hacu[n] and Leofric and eal seo scir his land clæne þa he hit unforbodan and unbesacan bohte and settan dæg to þæt man to ðam lande scolde faran and þa ilcan þe him ær landgemære læddon hit e[]an and cwædan gif ða landgemære ealswa wæron swa man heo on fruman lædde þæt se bisceop þæt land fulriht ahte þa com se bisceop þærto and se þe him land sealde and þa þe him ær [to gewit]nesse wæron and com Wulfstan and his sunu and þa þe hyra geferan wæron and heo ealle þa þa landgemære geridan eal swa heo man on fruman þam bisceope lædde and heo ealle cwædan þe [þær æt] wæron þæt se bisceop fulriht þæt land ahte þa se þær geanwyrde wæs þe him land sealde Spæcon ða Leofrices freond and Wulfstanes freond þæt hit betere wære þæt heora seht togæ[]de þonne hy ænige [sa]ce hym betweonan heoldan worhtan þa hyra seht þæt wæs þ[æ]t Leofric sealde Wulfstane and his suna an pund and twegra þegna að and wære himsylf þridde þæt he [on þ]am ilcan wolde beon gehealden gif seo spæc to Leofrice eode s[wa s]wa heo þa wæs to Wulfstane gega[n] þis wæs ur[e] ealra seht Wulfstan and his sunu sealdon þa þæt land clæne Leofrice and Leofric and [W]u[lfs]tan and Wulfric þam bisceope clæne land and unbesacan ær dæge and æfter to gyfanne þær him leofost wære Her swutelað seo gewitnes and se borh þe þær æt wæron þæt wæs ærest se bisceop and Le[ofric] and Wulfstan and Brihtwine and Cynsig and Wynstan and Ægelwig munuc and Ælwine mæssepreost and Ælmær mæssepreost and Wulfric mæssepreost and Cyneword æt Pebbewurðy and Ælewig []nham and Eadwig his mæg and Wulfri[c] æt Cloddesheale and Sæword æt Uptuny and Wulfric æt Bynningtune and Wulfsig Madding and mænig god cniht toeacan þysan Nu syndan þissa gewrita þreo an on Wigernaceastre æt Sancta Marian þær þæt land toherð and oðer on Hereforda æt Sancte Æþelbrihte and þridde a mid þam þe þæt land on hande stande God ælmihtig þone gehealde þe þis wille rihtlice healdan and gif ænig man þonne seo þe þis awendan wille God ælmihtig and Sancta Maria and ealle his leofan halgan þæne aniðerige ægþær ge her on life ge þær he længast wunian sceal buton he hit þe deoppor ær geb[e]te swa bisceop him tæce