Charter Document - 03720119

Px In ures drihtnes naman hælendes Cristes ic Leofinc bisceop mid þafunge and leafe Hearðacnutes cynges and þæs arwurþan hiredes æt Wigornaceastre ge iunges ge ealdes gebocige sumne dæl landes minan holdan and getreowan þegene þam is Ægelric nama ii hida æt Eadmunddescotan hæbbe he and wel bruce for his eadmodre gehersumnysse and for his licwurðan sceatte þæt is þæt he hit hæbbe and well bruce his dæg and æfter his dæge twam erfewardum þanðe him leofest sy and him betst to geearnian wylle and he hit hæbbe to freon ælces þinges butan wallgeweorce and brygcgeweorce and ferdsocne God ælmihtig þone gehealde þe þas ure sylena and ure gerædnyssa healdan wylle on ælce healfe gif ænig þonne sy uppahofen and inblawen on þa oferhyda þære geættredan deofles lare and wylle þas ure sylena gewemman oððe gewonian on ænigum þingum wite he hine amansumadne mid Annaniam and Saphiram on ece forwyrd butan he hit her ær wurðlice gebete Gode and mannum Ðis wæs gedon þy geare þe wæs agan fram Cristes gebyrtide an þusend wintra and twa and xlii wintra Ðis is seo gewitnes þæt is Hearþacnut cyng and Ælfgeofu his modor and Lyfing bisceop and eall se hired on Wigraceastre and Ælfward bisceop and se hired on Eofeshomme and Godwine abbod and se hired on Wincelcumbe and Leofric eorl and ealle þa þegenas on Wigraceastrescire ge englisce ge denisce