Charter Document - 03720112

+ Rixiendum ussum Dryhtene þem Helendan Criste Efter ðon þe agan was ehta hund wintra et syx et hundnigontig Efter his acennednesse et þy feowerteoþan gebonngere þa ðy gere gebeon Æþelred alderman alle Mercna weotan tosomne to Gleaweceastre biscopas et aldermen et alle his duguðe et ðæt dyde be Ælfredes cyninges gewitnesse et leafe et heo þa þær smeadan hu heo ryhtlicast heora þeodscipe ægþer ge for Gode ge for weorlde gehealdan mehton et ec monige men ryhtan ge godcundra hada ge weorldcundra ge on londum ge on ma þara þinga þe heo on forhaldne weran Ða cydde Werferð biscop þam weotum þæt him wære forneh eall þæt wudulond ongereafad þe to Wuduceastre belomp þæt Æþelbald cyning gesalde to Weogernaceastre him to ecre ælmessan Wilferðe biscope to mæstlonde et to wudulonde et þæt sæde þæt hit wære sum genumen to Bislege sum to Æfeningum sum to Scorranstane sum to Þornbyrig þes þe he wende Þa cwædan alle þa weotan þæt mon uðe þære circan ryhtes swa wel swa oþerre et ða sona was Eðelwald þæs wordes þæt he no þes rihtes wiðsacan wolde et sæde þæt Aldberht et Alhhun biscop wæron ær ymb þæt ilce et cweð þæt he ælcre circan aa his dæla ryhtes uðe et hit þa swiþe mildelice ageaf þam biscope et heht his geneat Ecglaf hatte ridan mid Ceastersetna preoste Wulfhun hatte et he hine þa gelædde all ða gemæru swa he him of þam aldan bocum rædde hu hit ær Æþelbald cyning gemærude et gesalde Ða wilnede Æþelwald swa þeh to þam biscope et to þam higen þæt heo him mildemode alefdan þæt he his moste brucan ða hw[ile] ðe he wære et heo Alhmund his sunu et heo hit woldon habban on his læne et hina et he næfre ne heora nowðer hine bereafian wolde þære mæstreddene þe he him alefed hæfde on Longanhrycge þam tidum þe hine God him salde Ond he þa Æþelwald þæt word gecwæð þæt hit aa hæfde ofer Godes est þe hit hæfde butan þære circan hlaforde þe he hit to ageaf butan Alhmunde et þæt þonne on ðam geran þe he heolde þa ilcan freondreddene þe he heold wið ðone biscop Gif hit þonne geberie þæt Alhmund swa ða freondreddene haldan nolde oððe hine mon oferricte þæt he ne moste londes wyrðe beon oþðe ðridda wend gif him ær his ende geselde þæt þonne þære circan hlafard fenge to his londe swa hit Mercna weotan on þam gemote gerahtan et him ða bec wisedon þæs londes Þis wæs gedon on Æþelredes gewitnesse aldermonnes et on Æþelflæde et Æþulfes aldermonnes et Æþelferðes aldermonnes et Alhhelmes aldermonnes et Eadnoðes et Ælfredes et Werferðes et Æþelwaldes mæssepreostes et his agenra maga Æþelstanes et Æþelhunes et ec Alhmundes his agenes suna et þus se Ceastersetna preost hit gerad et se Æþelwaldes geneat mid hine ærost on Gemyðlege et þanon on Roddanbeorg silfne þanon on Smececumb þanon on Sengetlege þanon on Heardanlege þære is oðer noma Dryganleg þæt swa on þa læssan Nægleslege et swa to Æþelferðes londe Þus him gewisede se Æþelwaldes mo[n] þa gemæru swa him þa aldan bec ryhtan et wisedon