Charter Document - 03720084

Ðæm ælmihtigan Gode þære soðan annesse et ðære halgan ðrynesse on heofonum sie lof et wuldor et dæda þoncung ealra þæra goda þe he us forgifen hafað For ðæs lufan æt ærestan Æðeldred ealdorman et Æðelflæd et for Sancte Petres et ðære cyricean æt Weogernaceastre et eac for Wærferðes biscopes bene heora freondas hehtan bewyrcean þa burh æt Weogernaceastre eallum þæm folce to gebeorge et eac þæron Godes lof to arærenne et heo nu cyðað on Godes gewitnesse on þisse bec þæt heo willað on ælcum þæra gerihta þe to heora hlaforddome gebyrað oððe on ceapstowe oððe on stræte ge binnan byrg ge butan geunnan healfes Gode et Sancte Petre et þære cyrcean hlaforde þæt þy arlicor on þære stowe beon mæge et eac þy eaðr be summum dæle þæs heoredes helpon et þæt heora gemynde on ecnesse ðy fæstlicor on ðære stowe seo ða hwile ðe Godes hearsumnes on ðam mynstre beo On[d] Wærferð biscop et se heored habbað gesetted þæs godcundnesse beforan ðære þe him mon dæghwamlice deð ge be heora life ge æfter heora life þæt ðonne æt eolcum uhtsonge et æt ælcum æfensonge et æt eolcum undernsonge De profundis ðone sealme ða hwile þe heo lifgeon et æfter heora life Laudate Dominum et ælce Sæternesdæge on Sancte Petres cyrcean ðrittig sealma et heora mæssan ægðer ge for heo lifgende ge eac forðgeleorde Ond þonne cyðeð Æþelræd et Æþelflæd þæt he willað mid estfullan mode ðisses unnan Gode et Sancte Petre on Ælfredes cyninges gewitnesse et ealra ðæra witena ðe on Myrcna land syndon butan þæt se wægnscilling et se seampending gonge to ðæs cyninges handa swa he ealning dyde æt Saltwic Ah elles ge landfeoh ge fihtewite ge stale ge wohceapung ge burhwealles sceatinge ge ælc þæra wonessa ðe to ænigre bote gebyrie þæt hit age healf ðære cyrcean hlaford Godes þances et Sancte Petres swa swa hit mon to ceapstowe gesette et on strætum Ond wiðutan ða ceapstowe seo se biscop his landes et ealra his gerihta wyrðe swa hit ær ure foregengan gesetton et gefreodan et Æðelræd et Æðelflæd ðis dydon on Ælfredes cyninges gewitnesse et on Myrcna witena ðæra naman her be æftan awritene standað et on Godes ealmihtiges naman halsiað ealle heora æfterfylgendan þæt nænig mon ðæs ælmæssan ne wanige þe heo for Godes lufan et Sancte Petres to ðære cyricean geseald habbað