Charter Document - 03700170
| Charter Number: | 03700170 |
|---|---|
| Cartulary Title: | Charters of Christ Church Canterbury |
| Charter Language: | English |
| Charter Origin: | Religious |
| Charter Type(s): | Agreement |
| Date: | 1045 - 1047 |
| Date type: | Assigned |
| Resource Link(s): |
eSawyer (S 1471) |
Charter:
+ Her swutelað on þisum gewrite embe þa forewyrd þe Ægelric worhte wið Eadsige arcebisceop æt þam lande æt Cert þe Ceolnoð arcebisceop gebohte æt Hæleþan þam þegene mid his agenan sceatte et Aþelulf cing hit gebocode Ceolnoþe arcebisceope on ece yrfe þis synd þænne þa forewyrd þæt Ægelric hæbbe þæt land æt Cert his dæg et æfter his dæge ga þænne þæt land þam arcebisceope Eadsige on hand swa gegodod swa heom bam gerisan mage et syððan heora begra dæg agan si Ægelrices et þæs arcebisceopes Eadsiges þænne ga þis foresprecene land into Cristes cyricean mid mete et mid mannan eal swa hit stande for Ægelrices sawle et for Eadsiges arcebisceopes þam Godes þeowan to fostre et to scrude þe þærinne Godes lof dreogan sceolan dæges et nihtes et Ægelric gifð þa landboc þe þærto gebyreð on his life Criste et þam hirede him to ecere ælmessan et bruce Ægelric et Esbearn his sunu þara oðra landa heora twegra dæg to þam ilcan forewyrdan þe Ægelnoð arcebisceop et Ægelric ær geworhtan þæt is Stuting et Melentun et se haga binnan port þe Ægelric himsylfan getimbrod hæfde et æfter heora twegra dæge fo se arcebisceop Eadsige þærto gyf he leng libbe þænne hi oððe loc hwa his æftergencga þænne beo butan sum heora freonda þa land furþor on þæs arcebisceopes gemede ofgan mage to rihtan gafole oððe to oþran forewyrdan swa hit man þænne findan mage wið þone arcebisceop þe þanne libbe et þises is to gewitnesse Eadweard cyncg et Ælfgyfu seo hlæfdige et Ælfwine bisceop et Stigand bisceop et Godwine bisceop et Godric decanus et eal se hired æt Cristes cyricean et Wulfric abbud et eal se hired æt sancte Augustine et Ælfwine abbud et Siweard abbud et Wulfnoð abbud et Godwine eorl et Leofric eorl et Atsur roda et Ælfstan steallære et Eadmær æt Burhham et Godric æt Burnan et Ælfwine se reada et mænig man þærtoeacan ge gehadude ge læwede binnan burgan et butan et gif ænig man on uferan dagan gehadud oððe læwede þisne cwyde wille awendan awende hine God ælmihtig hrædlice of þisan lænan life into helle wite et þær a wunige mid eallan þam deoflan þe seo laðlice wunung betæht is buton he þe deoppor hit gebete ær his ende wið Crist sylfne et wið þone hired Nu synd þissa gewrita þreo an is innan Cristes cyricean et oþer æt sancte Augustine et þæt þridde hæfð Ægelric mid him sylfan