Charter Document - 03700164

Her kyþ on þison gewrite þæt Harold king let beridan Sandwic of Cristes cyrcean him sylfan to handa et hæfde hit him wel neh twelf monað et twegen hæringc timan swa þeah fullice eall ongean Godes willan et agen ealra þara halgena þe restað innon Cristes cyrcean swa swa hit him syððan sorhlice þær æfter agiode et amanc þisan siþan siðe wearð Ælfstan abbod æt sancte Augustine et begeat mid his smehwrencan et mid his golde et seolfre eall dyrnuncga æt Steorran þe þa wæs þæs kinges rædesmann þæt him gewearð se þridda penig of þære tolne on Sandwic þa gerædde Eadsige arcebiscop þa he þis wiste et eall se hired æt Cristes cyrcean betweonan heom þæt man sende Ælfgar munuc of Cristes cyrcean to Harolde kingce et wæs se king þa binnan Oxanaforde swyþe geseocled swa þæt he læg orwene his lifes þa wæs Lyfingc biscop of Defenanscire mid þam kincge et Þancred munuc mid him þa com Cristes cyrcean sand to þam biscop et he forð þa to þam kincge et Ælfgar munuc mid him et Oswerd æt Hergerdesham et Þancred et sædon þam kinge þæt he hæfde swyðe agylt wið Crist þæt he æfre sceolde niman ænig þing of Cristes cyrcean þe his foragengceon dydon þiderinn sædon þam kinge þa embe Sandwic þæt hit wæs him to handa geriden þa læg se king et asweartode eall mid þare sage et swor syþþan under God ælmihtine et under ealle halgan þarto þæt hit næfre næs na his ræd na his dæd þæt man sceolde æfre Sandwic don ut of Cristes cyrcean Þa wæs soðlice gesyne þæt hit wæs oðra manna geþeaht næs na Haroldes kinges et soðlice Ælfstanes abbodes ræd wæs mid þam mannan þe hit of Cristes cyrcean ut geræddon þa sende Harold king Ælfgar munuc agen to þam arcebiscop Eadsige et to eallon Cristes cyrcean munecan et grette hig ealle Godes gretincge et his et het þæt hig sceoldan habban Sandwic into Cristes cyrcean swa full et swa forð swa hig hit æfre hæfdon on ænies kinges dæge ge on gafole ge on streame ge on strande ge on witun ge on eallon þam þingan þe hit æfre ænig king fyrmest hæfde ætforan him þa Ælfstan abbod þis ofaxode þam com he to Eadsige arcebiscop et bæd hine fultumes to þam hirode embe þone þriddan penig et hi begen þa to eallon gebroþran et bædon þone hired þæt Ælfstan abbod moste beon þæs þriddan peniges wurðe of þære tolne et gyfan þam hirede x pund ac hy forwyrndon heom ealle togædere endemes þæt he hit na sceolde næfre gebidan et wæs þeah Eadsige arcebiscop swiðor his fultum þonne þæs hiredes et þa he ne mihte na forð hermid þa gyrnde he þæt he moste macian fornan gen Mildryþe æker ænne hwerf wið þone wodan to werianne ac eall se hired him forwyrnde þæs forð ut mid ealle et se arcebiscop Eadsige let hit eall to heora agene ræde þa gewearð se abbod Ælfstan æt mid micelan fultume et let delfon æt Hyppeles fleote an mycel gedelf et wolde þæt scipryne sceolde þærinne licgean eall swa hig dydon on Sandwic ac him na speow nan þingc þæron forþam he swingð eall on idel þe swincð ongean Cristes willan et se abbod let hit eall þus et se hired fengc to heora agenan on Godes gewitnesse et sancta Marian et ealra þara halgena þe restað innan Cristes cyrcean et æt sancte Augustine þis is eall soð gelyfe se þe wylle na gebad Ælfstan abbod næfre on nanan oþre wisan þone þriddan penig of Sandwic Godes bletsung si mid us eallon a on ecnysse Amen