Charter Document - 03700142
| Charter Number: | 03700142 |
|---|---|
| Cartulary Title: | Charters of Christ Church Canterbury |
| Charter Language: | English |
| Charter Origin: | Religious |
| Charter Type(s): | Will |
| Date: | 1014 |
| Date type: | Assigned |
| Resource Link(s): |
eSawyer (S 1503) Canterbury Cathedral - Chart. Ant. H.68 |
Charter:
+ On godes ælmihtiges naman Ic Æþestan æþeling geswutelige on þysum gewrite hu ic mine are et mine æhta geunnen hæbbe gode to lofe et minre saule to alysednysse et mines fæder Æþelredes cynges þe ic hit æt geearnode þæt is ærest þæt ic geann þæt man gefreoge ælcne witefæstne mann þe ic on spræce ahte et ic geann in mid me þær ic me reste Criste et sancte Petre þæs landes æt Eadburgebyrig þe ic gebohte æt minan fæder mid twam hund mancosan goldes be gewihte et mid V pundan seolfres et þæt land æt Merelafan þe ic gebohte æt minum fæder mid þridde healf hund mancosan goldes be gewihte et þæt land æt Mordune þæt min fæder me to let Ic gean into þære stowe for uncer begra saule et ic hine þæs bidde for godes lufan et for sancta Marian et for sancte Petres þæt hit standan mote et þæs swurdes mid þam sylfrenan hiltan þe Wulfric worhte et þone gyldenan fetels et þæne beh þe Wulfric worhte et þone drencehorn þe ic ær æt þam hirede gebohte on ealdan mynstre et ic wille þæt man nime þæt feoh þe Aþelwoldes laf me ah to gyldene þe ic for hyre are gesceoten hæbbe et betæce Ælfsige bisceope into ealdan mynstre for mine saule þæt synd XII pund be getale et ic geann into Cristes cyrican on Cantwarabyrig þæs landes æt Holungaburnan et þæs þe þærto hyrð buton þære anre sulunge þe ic Siferðe geunnen hæbbe et þæs landes æt Garwaldintune et ic ann þæs landes æt Hryðerafelda Into nunnan mynstre Sancta Marian þances et ænne sylfrene mele on fif pundon et Into niwan mynstre ænne sylfrene hwer on fif pundon on þære halgan þrymnesse naman þe seo stow is forehalig et ic geann to Sceaftenesbyrig to þære halgan rode et to sancte Eadwearde þara VI punda þe Ic Eadmunde minon breðer gewissod hæbbe et Ic geann minon fæder Æþelræde cynge þæs landes æt Cealhtune buton þam ehta hidan þe Ic Ælmære minon cnihte geunnennen hæbbe et þæs landes æt Norðtune et þæs landes æt Mollintune et þæs seolferhiltan swurdes[]g þe Ulfcytel ahte et þære byrnan þe mid Morkære is et þæs horses þe Þurbrand me geaf et þæs hwitan horses þe Leofwine me geaf et Ic geann Eadmunde minon breðer þæs swurdes þe Offa cyng ahte et þæs swurdes mid þam pyttedan hiltan et anes brandes et ænne seolforhammenne blædhorn et þara landa þe ic ahte on East Englan et þæs landes æt Peacesdele et Ic wylle þæt mon gelæste ælce geare ane dægfeorme þam hirede into Elig of þysse are on Sancte Æþeldryðe mæssedæg et gesylle þær to mynstre an hund penega et gefede þær on þone dæg C þearfena et sy æfre seo ælmesse gelæst gearhwamlice age land se þe age þa hwile þe Cristendom stande et gif þa nellað þa ælmessan geforðian þe þa land habbað gange seo ar into sancte Æþeldryðe et Ic geann Eadwige minon breðer anes seolforhiltes swurdes et Ic geann Ælfsige bisceope þære gyldenan rode þe is mid Eadrice Wynflæde suna et anne blacne stedan et Ic geann Ælmære þæs landes æt Hamelandene þe he ær ahte et ic bidde minne fæder fur godes ælmihtiges lufan et fur minon þæt he þæs geunne þe Ic him geunnen hæbbe et Ic geann Godwine Wulfnoðes suna þæs landes æt Cumtune þe his fæder ær ahte et Ic geann Ælfswyðe minre fostermeder for hire myclon geearnungon þæs landes æt Westune þe Ic gebohte æt minon fæder mid þridde healf hund mancusan goldes be gewihte et Ic gean Ælfwine minon mæssepreoste þæs landes æt Heorulfestune et þæs malswurdes þe Wiðer ahte et mines horses mid minon gerædon et Ic geann Ælmære minon discþene þara ehta hida æt Cateringatune et anes fagan stedan et þæs sceardan swurdes et mines targan et Ic geann Siferðe þæs landes æt Hocganclife et anes swurdes et anes horses et mines bohscyldes et Ic geann Æþelwerde Stameran et Lyfingce þæs landes æt Tywingan et Ic ann Leofstane Leofwines breðer Cwattes þære landare þe Ic of his breðer nam et Ic geann Leommære æt Biggrafan þæs landes þe ic him ær of nam et Ic geann Godwine Dreflan þara þreora hida æt Lutegaresheale et Ic geann Eadrice Wynflæde Sunu þæs swurdes þe seo hand is on gemearcod et Ic geann Æþelwine minon Cnihte þæs swurdes þe he me ær sealde et Ic geann Ælfnoðe minon swurdhwitan þæs sceardan malswurdes et minon heardeorhunton þæs stodes þe is on Colungahrycge et gehealde mon of minon golde Ælfric æt Bertune et Godwine Drefelan æt swa miclon swa Eadmund min broðor wat þæt ic heom mid rihte to gyldanne ah Nu þancige Ic minon fæder mid ealre eadmodnesse on godes ælmihtiges naman þære andsware þe he me sende on frigedæg æfter middessumeres mæssedæge be Ælfgare Ælffan suna þæt wæs þæt he me Cydde mines fæder worde þæt ic moste be godes leafe et be his geunnan minre are et minra æhta swa me mæst ræd þuhte ægðer ge for gode ge for worulde et þysse andsware is to gewitnesse Eadmund min broðor et Ælfsige bisceop et Byrhtmær abbod et Ælmær Ælfrices sunu nu bidde ic ealle þa witan þe minne cwyde gehyron rædan ægðer ge gehadode ge læwede þæt hi beon on fultume þæt min Cwyde standan mote Swa mines fæder leaf On minon Cwyde stænt Nu cyðe Ic þæt ealle þa þingc þe Ic to gode into godes Cyrican et godes þeowan geunnen hæbbe Sy gedon for mines leofan fæder Sawle Æþelredes Cyncges et for minre et Ælfþryðe minre Ealdemodor þe me afedde et for ealra þara þe me to þyson godan gefylstan et Se þe þysne Cwyde þurh ænig þingc awende habbe him wið god ælmihtigne gemæne et wið Sancta Marian et wið Sancte Peter et wið ealle þa þe godes naman heriað