Charter Document - 03700133
| Charter Number: | 03700133 |
|---|---|
| Cartulary Title: | Charters of Christ Church Canterbury |
| Charter Language: | English |
| Charter Origin: | Religious |
| Charter Type(s): | Record |
| Date: | 0990 - 0992 |
| Date type: | Assigned |
| Resource Link(s): |
eSawyer (S 1454) |
Charter:
+ Her cyþ on þysum gewrite hu Wynflæd gelædde hyre gewitnesse æt Wulfamere beforan Æþelrede cyninge þæt wæs þonne Sigeric arcebiscop et Ordbyrht biscop et Ælfric ealderman et Ælfþryþ þæs cyninges modor þæt hi wæron ealle to gewitnesse þæt Ælfric sealde Wynflæde þæt land æt Hacceburnan et æt Bradanfelda ongean þæt land æt Deccet þa sende se cyning þær rihte be þam arcebiscope et be þam þe þær mid him to gewitnesse wæron to Leofwine et cyþdon him þis þa nolde he butan hit man sceote to scirgemote þa dyde man swa þa sende se cyning be Æluere abbude his insegel to þam gemote æt Cwicelmeshlæwe et grette ealle þa witan þe þær gesomnode wæron þæt wæs Æþelsige biscop et Æscwig biscop et Ælfric abbud et eal sio scir et bæd et het þæt hi scioldon Wynflæde et Leofwine swa rihtlice geseman swa him æfre rihtlicost þuhte et Sigeric arcebiscop sende his swutelunga þærto et Ordbyrht biscop his þa getæhte man Wynflæde þæt hio moste hit hyre geahnian þa gelædde hio þa ahnunga mid Ælfþryþe fultume þæs cyninges modor þæt is þonne ærest Wulfgar abbud et Wulfstan priost et Æfic þara æþelinga discsten et Eadwine et Eadelm et Ælfelm et Ælfwine et Ælfweard et Eadwold et Eadric et Ælfgar et Eadgyfu abbudisse et Liofrun abbudisse et Æþelhild et Eadgyfu æt Leofecanoran et hyre swustor et hyre dohtor et Ælfgy[fu et hyr]e dohtor et Wulfwyn et Æþelgyfu et Ælfwaru et Ælfgyfu et Æþelflæd et menig god þegen et god wif þe we ealle atellan ne magon þæt [þær] forþcom eal se fulla ge on werum ge on wifum Þa cwædon þa witan þe þær wæron þæt betere wære þæt man þene aþ aweg lete þonne hine man sealde forþan þær syþþan nan freondscype nære et man wolde biddan þæs reaflaces þæt he hit sciolde agyfan et forgyldan et þam cyninge his wer þa let he þone aþ aweg et sealde Æþelsige biscope unbesacen land on hand þæt he þanon forð syþþan þæron ne spræce þa tæhte man hyre þæt hio sciolde bringan his fæder gold et siolfor eal þæt hio hæfde þa dyde hio swa hio dorste hyre aþe gebiorgan þa næs he þagyt on þam gehealden butan hio sceolde swerian þæt his æhta þær ealle wæron þa cwæþ hio þæt hio ne mihte hyre dæles ne he his et þyses wæs Ælfgar þæs cyninges gerefa to gewitnesse et Byrhtric et Leofric æt Hwitecyrcan et menig god man toeacan him