Charter Document - 03700124
| Charter Number: | 03700124 |
|---|---|
| Cartulary Title: | Charters of Christ Church Canterbury |
| Charter Language: | English |
| Charter Origin: | Religious |
| Charter Type(s): | Grant |
| Date: | 0959 |
| Date type: | Assigned |
| Resource Link(s): |
eSawyer (S 1211) |
Charter:
+ Eadgifu cyþ þam arcebisceop et Cristes cyrcean hyrede hu hire land com æt Culingon Þæt is þæt hire læfde hire fæder land et boc swa he mid rihte beget et him his yldran læfdon Hit gelamp þæt hire fæder aborgude XXX punda æt Godan et betæhte him þæt land þæs feos to anwedde et he hit hæfde VII winter Þa gelamp emb þa tid þæt man beonn eall Cantware to wigge to Holme Þa nolde Sigelm hire fæder to wigge faron mid nanes mannes scette unagifnum et agef þa Godan XXX punda et becwæþ Eadgife his dehter land et boc sealde Þa he on wigge afeallen wæs þa ætsoc Goda þæs feos ægiftes et þæs landes wyrnde oð þæs on syxtan geare Þa spræc hit fæstlice Byrhsige Dyrincg swa lange oð þa witan þe þa wæron gerehton Eadgife þæt heo sceolde hire fæder hand geclænsian be swa myclan feo et heo þæs aþ lædde on ealre þeode gewitnesse to Æglesforda et þær geclænsude hire fæder þæs ægiftes be XXX punda aþe Þa gyt heo ne moste landes brucan ær hire frynd fundon æt Eadwearde cyncge þæt he him þæt land forbead swa he æniges brucan wolde et he hit swa alet Þa gelamp on fyrste þæt se cynincg Godan oncuþe swa swyþe swa him man ætrehte bec et land ealle þa þe he ahte et se cynincg hine þa et ealle his are mid bocum et landum forgeaf Eadgife to ateonne swa swa heo wolde Þa cwæð heo þæt heo ne dorste for Gode him swa leanian swa he hire to geearnud hæfde et agef him ealle his land buton twam sulungum æt Osterlande et nolde þa bec agifan ær heo wyste hu getriwlice he hi æt landum healdan wolde Þa gewat Eadweard cyncg et fencg Æþelstan to rice Þa Godan sæl þuhte þa gesohte he þone kynincg Æþelstan et bæd þæt he him geþingude wiþ Eadgife his boca edgift et se cyncg þa swa dyde et heo him ealle agef buton Osterlandes bec et he þa boc unnendre handa hire to let et þara oþerra mid eaðmettum geþancude et ufenan þæt twelfa sum hire aþ sealde for geborenne et ungeborenne þæt þis æfre gesett spæc wære et þis wæs gedon on Æþelstanes kynincges gewitnesse et his wytena æt Hamme wiþ Læwe et Eadgifu hæfde land mid bocum þara twegea cyninga dagas hire suna Þa EadrEd geendude et man Eadgife berypte ælcere are þa namon Godan twegen suna Leofstan et Leofric on Eadgife þas twa forespecenen land æt Culingon et æt Osterlande et sædon þam cilde Eadwige þe þa gecoren wæs þæt hy rihtur hiora wæren þonne hire Þæt þa swa wæs oþ Eadgar astiþude et he et his wytan gerehton þæt hy manfull reaflac gedon hæfden et hi hire hire are gerehton et agefon Þa nam Eadgifu be þæs cynincges leafe et gewitnesse et ealra his bisceopa þa bec et land betæhte in to Cristes cyrcean mid hire agenum handum upon þone altare lede þan hyrede on ecnesse to are et hire sawle to reste et cwæþ þæt Crist sylf mid eallum heofonlicum mægne þane awyrgde on ecnesse þe þas gife æfre awende oþþe gewanude Þus com þeos ar in to Cristes cyrcean hyrede