Charter Document - 03700104
| Charter Number: | 03700104 |
|---|---|
| Cartulary Title: | Charters of Christ Church Canterbury |
| Charter Language: | English |
| Charter Origin: | Religious |
| Charter Type(s): | Letter |
| Date: | 0899 - 0924 |
| Date type: | Assigned |
| Resource Link(s): |
eSawyer (S 1445) |
Charter:
+ Leof ic ðe cyðe hu hit wæs ymb ðæt lond æt Funtial ða fif hida ðe Æðelm Higa ymb spycð Ða Helmstan ða undæde gedyde ðæt he Æðeredes belt forstæl ða ongon Higa him specan sona on mid oðran onspecendan et wolde him oðflitan ðæt lond Ða sohte he me et bæd me ðæt ic him wære forespeca forðon ic his hæfde ær onfongen æt biscopes honda ær he ða undæde gedyde Ða spæc ic him fore et ðingade him to Ælfrede cinge Ða God forgelde his saule ða lyfde he ðæt he moste beon ryhtes wyrðe for mire forspæce et ryhtrace wið Æðelm ymb ðæt lond Ða het he hie seman ða wæs ic ðara monna sum ðe ðærto genemned wæran et Wihtbord et Ælfric wæs ða hrælðen et Byrhthelm et Wulfhun ðes blaca æt Sumortune et Strica et Ubba et ma monna ðonne ic nu genemnan mæge Ða reahte heora ægðer his spell ða ðuhte us eallan ðæt Helmstan moste gan forð mid ðon bocon et geagnigean him ðæt lond ðæt he hit hæfde swa Æðeldryð hit Osulfe on æht gesealde wið gemedan feo et heo cwæð to Osulfe ðæt heo hit ahte him wel to syllanne forðon hit wæs hire morgengifu ða heo æ[re]st to Aðulfe com et Helmstan ðis eal on ðon aðe befeng et Ælfred cing ða Osulfe his hondsetene sealde ða he ðæt lond æt Æðeldryðe bohte ðæt hit swa stondan moste et Eadweard his et Æðelnað his et Deormod his et ælces ðara monna ðe mon ða habban wolde Ða we hie æt Weardoran nu semdan ða bær mon ða boc forð et rædde hie ða stod seo hondseten eal ðæron Ða ðuhte us eallan ðe æt ðære some wæran ðæt Helmstan wære aðe ðæs ðe near Ða næs Æðelm na fullice geðafa ær we eodan in to cinge et sædan eall hu we hit reahtan et be hwy we hit reahtan et Æðelm stod self ðærinne mid et cing stod ðwoh his honda æt Weardoran innan ðon bure Ða he ðæt gedon hæfde ða ascade he Æðelm hwy hit him ryht ne ðuhte ðæt we him gereaht hæfdan cwæð ðæt he nan ryhtre geðencan ne meahte ðonne he ðone að agifan moste gif he meahte Ða cwæð ic ðæt he wolde cunnigan et bæd ðone cing ðæt he hit andagade et he ða swa dyde et he gelædde ða to ðon andagan ðone að be fulla[n et] bæd me ðæt ic him fultemade et cwæð ðæt him wære leofre ðæt he [ðæt land me se] alde ðonne se að forburste oððe hit æfr[g]æde Ða cwæð ic ðæt ic him wolde fylstan to ryhte et næfre to nanan wo on þa gerada ðe he his me uðe et he me ðæt on wedde gesealde et we ridan ða to ðon andagan ic et Wihtbord rad mid me et Byrhthelm rad ðider mid Æðelme et we gehyrdan ealle ðæt he ðone að be fulan ageaf ða we cwædan ealle ðæt hit wære geendodu spæc ða se dom wæs gefylled et leof hwonne bið engu spæc geendedu gif mon ne mæg nowðer ne mid feo ne mid aða geendigan[] Oððe gif mon ælcne dom wile onwendan ðe Ælfred cing gesette hwonne habbe we ðonne gemotað[] et he me ða boc ða ageaf swa he me on ðon wedde ær geseald hæfde sona swa se að agifen was et ic him gehet ðæt he moste ðes londes brucan ða hwile ðe he lifde gif he [] hine wolde butan bysmore gehealdan Ða onufan ðæt ymban oðer healf gear nat ic hweðer ðe ymb tua ða forstæl he ða unlædan oxan æt Funtial ðe he mid ealle fore forwearð et draf to Cytlid et hine mon ðæræt aparade et his speremon ahredde ða sporwreclas Ða he fleah ða torypte hine an breber ofer ðæt nebb ða he ætsacan wolde ða sæde him mon ðæt to tacne Ða swaf Eanulf Penearding on wæs gerefa ða genom eal ðæt yrfe him on ðæt he ahte to Tyssebyrig Ða ascade ic hine hwy he swa dyde ða cwæð he ðæt he wære ðeof et mon gerehte ðæt yrfe cinge forðon he wæs cinges mon et Ordlaf feng to his londe forðon hit wæs his læn ðæt he on sæt he ne meahte na his forwyrcan et tu hine hete ða flyman ða gesahte [gesohte] he ðines fæder lic et brohte insigle to me et ic wæs æt Cippanhomme mit te Ða ageaf ic ðæt insigle ðe et ðu him forgeafe his eard et ða are ðe he get on gebogen hæfð et ic feng to minan londe et sealde hit ðon biscope ða on ðine gewitnesse et ðinra weotena ða fif hida wið ðon londe æt Lidgeard wið fif hidan et biscop et eal hiwan forgeafan me ða feower et an was teoðinglond Ðonne leof is me micel neodðearf ðæt hit mote stondan swa hit nu gedon is et gefyrn wæs Gif hit elleshwæt bið ðonne sceal ic et wylle beon gehealden on ðon ðe ðe to ælmessan ryht ðincð + et Æðelm Higa eode of ðam geflite ða cing wæs æt Worgemynster on Ordlafes gewitnesse et on Osferðes et on Oddan et on Wihtbordes et on Ælfstanes ðys blerian et on Æðelnoðes