Charter Document - 03692008
| Charter Number: | 03692008 |
|---|---|
| Cartulary Title: | Charters of Christ Church Canterbury |
| Charter Language: | English |
| Charter Origin: | Royal |
| Charter Type(s): | Grant |
| Date: | 0694 |
| Date type: | Internal, A.D. |
| Resource Link(s): |
eSawyer (S 22) |
Charter:
And Wihtred fend to Cantuare rice et heold hit xxxiii wintra et sona ðas ðe he cing was he het gaderian mycel concilium on ðare stowe ðe is geclypod Baccancelde On ðare was [] Wihtred sittende Cantware cing et se arcebiscop [of Cantuarebyri] Brihtwald et se biscop Tobias of Hroueceastre et mid heom abbodas et abbedessen et manige wise menn ðar wæron gegaderade ealle to smeagende embe Godes cyrcan bote ða beoð innan Cent Nu agann se cing to sprecende [et sæde] Ic wylle þæt ealle ða mynstra et ða cyrican þa wæron giuene et becweðene Gode to wyr[ð]mynte be [ge]leafulra cinga dagan minra forgenglan et be minra magon dagon be Ægelberhtes cinges et þara ðe him æfterfyligdan swa beliuan Gode to wyrðmynte et festlice standan a to ecnesse æure ma Forðon ic Wihtr[ed] eorþlic cing from þam heouenlice [cinge] onbryd [et] mid and[an] ðare rihtwisnesse anæld of uran ea[l]dran fæderan gesetnesse ic habbe ðæt geleornod ðæt nan læwede man nah mid rihte [to] stingan hine a na[n]re cirican na a nan ðara ðingan ðe [to]cyrcan belimpð And for ði stranglice et trywlice we gesettað et demað et on Godes naman þes ealmihtiges et on ealra halgena we forbeodað eallon uron æftergengan cingan et ealdermannum et eallan læwedan mannum æure ænne hlauordscipe ouer circan et ouer eallan heora ðingan þe ic oððe mine yldran on ealdon dagan giuan Criste to loue on [ece] erfwyrðnesse et ure hlæfdian sancta Maria[n] et ðan halgan apostolan Ac loc hwenne hit [ge]wurðe þæt biscop [oððe] abbod oððe ab[b]edesse gewite of ðysan liue sy hit gecydd ðan arcebisceope et mid his ræde et geðeahte sy gecoren swilce wurþe beo et his lif ðe [man sceal] to swa [ge]donne ðinge cysan Asece [se] arbcebisceop [his lif] et his clænnesse et an ane wisan ne wurþe gecoræn nan na to swa gedonan þingan gehalgod butan þes arcebisceopes ræde Cyngas sceolan settan eorlas et ealdermen scirireuan et domesmenn et arcebisceop sceal Godes gelaðunge wissian et rædan [et biscopas] et abbodas et abbedessan preostas et diacon[as] ceosan et settan halgian et getryman mid godan mynegunga et [fore]bysene þe læste þe æni of Godes heorde dwelie et losie