Charter Document - 03690070
| Charter Number: | 03690070 |
|---|---|
| Cartulary Title: | Charters of Christ Church Canterbury |
| Charter Language: | English |
| Charter Origin: | Religious |
| Charter Type(s): | Will |
| Date: | 0833 - 0839 |
| Date type: | Assigned |
| Resource Link(s): |
Anglo Saxon Charters (S 1482) British Library - Cotton MS Augustus II 64 (f1r) eSawyer (S 1482) |
Charter:
Abban geroefan [a]rf[e]ged[a]l his geðinga to Kristes cirica[n] Testamentum Abbe cuius uxor Henhith dedit Cheafloke conventui tempore Chelnothi Anglice Anno DCCCXXXV + Ic Abba geroefa cyðe et writan hate hu min willa is þæt mon ymb min ærfe gedoe æfter minum dæge Ærest ymb min lond þe ic hæbbe et me God lah et ic æt minum hlafordum begæt is min willa gif me God bearnes unnan wille ðæt hit foe to londe æfter me et his bruce mid minum gemeccan et sioððan swæ forð min cynn ða hwile þe God wille ðæt ðeara ænig sie þe londes weorðe sie et land gehaldan cunne Gif me ðonne gifeðe sie ðæt ic bearn begeotan ne mege þonne is min willa þæt hit hæbbe min wiif ða hwile ðe hia hit mid clennisse gehaldan wile et min broðar Alchhere hire fultume et þæt lond hire nytt gedoe et him man sElle an half swulung an Ciollandene to habbanne et to brucanne wið ðan ðe he ðy geornliocar hire ðearfa bega et bewiotige et mon selle him to ðem londe IIII oxan et II cy et L scEpa et ænne horn Gif min wiif ðonne hia nylle mid clennisse swæ gehaldan et hire liofre sie oðer hemed to niomanne ðonne foen mine megas to ðem londe et hire agefen hire agen Gif hire ðonne liofre sie an mynster to ganganne oðða suð to faranne ðonne agefen hie twægen mine mEgas Alchhere et Aeðelwold hire twa ðusenda et fon him to ðem londe et agefe mon to Liminge L eawa et V cy fore hie et mon selle to Folcanstane in mid minum lice X oxan et X cy et C eawa et C swina et higum ansundran D pend wið ðan ðe min wiif þær benuge innganges swæ mid minum lice swæ sioððan yferran dogre swæ hwæder swæ hire liofre sie Gif higan ðonne oððe hlaford þæt nylle hire mynsterlifes geunnan oðða hia siolf nylle et hire oðer ðing liofre sie þonne agefe mon ten hund pend inn mid minum lice me wið legerstowe et higum an sundran fif hund pend fore mine sawle et ic bidde et bebeode swælc monn se ðæt min lond hebbe ðæt he ælce gere agefe ðem higum æt Folcanstane L ambra maltes et VI ambra gruta et III wega spices et ceses et CCCC hlafa et an hriðr et VI scep et swælc monn se ðe to minum ærfe foe ðonne gedele he ælcum messepreoste binnan Cent mancus goldes et ælcum Godes ðiowe pend et to Sancte Petre min wærgeld twa ðusenda et Freoðomund foe to minum sweorde et agefe ðeræt feower ðusenda et him mon forgefe ðeran ðreotene hund pending et gif mine broðar ærfeweard gestrionen ðe londes weorðe sie þonne ann ic ðem londes Gif hie ne gestrionen oðða him sylfum ælles hwæt sEle æfter hiora dege ann ic his Freoðomunde gif he ðonne lifes bið Gif him elles hwæt sæleð ðonne ann ic his minra swæstarsuna swælcum se hit geðian wile et him gifeðe bið et gif þæt gesele þæt min cynn to ðan clane gewite ðæt ðer ðeara nan ne sie ðe londes weorðe sie þonne foe se hlaford to et ða higan æt Kristes cirican et hit minum gaste nytt gedoen An ðas redenne ic hit ðider selle ðe se monn se ðe Kristes cirican hlaford sie se min et minra erfewearda forespreoca et mundbora et an his hlaforddome we bian moten + Ic Ciolnoð mid Godes gefe ærcebiscop ðis write et ðeafie et mid Cristes rode tacne hit festniæ + Ic Beagmund preost ðis ðeafie et write + Ic Wærhard preost abbod ðis ðeafie et write + Ic Abba geroefa ðis write et festnie mid Kristes rode tacne + Ic Aeðelhun preost ðis ðeafie et write + Ic Abba preost ðis ðeafie et write + Ic Wigmund preost ðis write et ðeafie + Ic Iof preost ðis ðeafie et write + Ic Osmund preost ðis ðeafie et write + Ic Wealhhere diacon ðis write et ðeafie + Ic Badanoð diacon ðis write et ðeafie + Ic Heaberht diacon ðis write et ðeafie + Ic Noðwulf subdiacon ðis write et ðeafie + Ic Wealhhere subdiacon ðis write et ðeafie + Ic Ciolwulf subdiacon ðis write et ðeafie + Heregyð hafað ðas wisan binemned ofer hire deg et ofer Abban ðæm higum et Cristes cirican of ðæm londe et Cealflocan ðæt is ðonne ðritig ombra alað et ðreo hund hlafa ðeara bið fiftig hwitehlafa an weg spices et ceses an ald hriðer feower weðras an suin oððe sex weðras sex gosfuglas ten hennfuglas ðritig teapera gif hit wintres deg sie sester fulne huniges sester fulne butran sester fulne saltes et Heregyð bibeadeð ðem mannum ðe efter hire to londe foen on Godes noman ðæt hie fulgere witen ðæt hie ðiss gelEsten ðe on ðissem gewrite binemned is ðem higum to Cristes cirican et ðæt sie simle to higna blodlese ymb twelf monað agefen et se mann se to londe foe agefe hire erfehonda XIII pund pendinga et hio forgifeð fiftene pund for ðy ðe mon ðas feorme ðy soel gelæste