Charter Document - 03670031
| Charter Number: | 03670031 |
|---|---|
| Cartulary Title: | The Register of Bishop Quivel. |
| Charter Language: | Latin |
| Charter Origin: | Religious |
| Charter Type(s): | Exemption |
| Date: | 1284 |
| Date type: | Internal, A.D., Calendar, Episcopal |
| Resource Link(s): |
|
Charter:
Petrus [] dilecto filio Magistro Roberto de Marisco salutem graciam et benediccionem Ob probitatis tue merita que de te nedum crebro audivimus set per vestram honestam et laudabilem conversacionem quam multis retro temporibus fide cognovimus oculata persone tue tanquam bene merite graciam facere volentes quam possumus in presenti Vicariam Parochialis Ecclesie Sancti Karentoci et Capelle Sancte Columbe Minoris ab eadem dependentis tibi conferimus intuitu caritatis volentes et ordinantes quod Vicaria ipsa consistat in omnibus fructibus et proventibus Prebendarum que aliquando fuerunt Dominorum Nicholai de Brimmore et Johannis de Sancto Kerano in Ecclesia Sancti Karentoci predicta exceptis duodecim marcis in quibus predictas duas Prebendas pro equali porcione consistere volumus liberas et quietas ab omni cura et onere quocumque sive sit ordinarium sive extraordinarium consuetum aut insolitum seu alio quocumque nomine censeri habeat quam quidem curam et onus ut premittitur volumus ut tibi et successoribus tuis incumbat omnino statuentes ut de ipsis xij marcis per te et successores tuos Vicarios qui pro tempore fuerint duobus Canonicis quibus ipsas Prebendas futuris temporibus nos vel Successores nostri duxerimus conferendas utrique scilicet eorum singulis annis de sex marcis ad duos Anni Terminos videlicet Sancti Michaelis et Annunciacionis Dominice in Ecclesia Sancti Karentoci predicta inperpetuum satis fiat equis porcionibus absque ulteriori mora seu dilacione quacumque sub pena eciam perpetue privacionis ab ipsa Vicaria si in solucione dictarum duodecim marcarum in toto vel in parte suis Terminis vel aliquo ipsorum fuerit quod absit cessatum prout nobis et Successoribus nostris magis videbitur expedire Volumus insuper quod tu et successores tui Vicarii habeatis et inhabitetis Domos que fuerunt dicti Johannis de Sancto Kerano quodque in predicta Capella inveniatis honestum Capellanum sumptibus tuis et successorum tuorum Divina inibi continue celebrantem Taxacionem et Ordinacionem dicte Vicarie augendi seu minuendi seu alias de ipsa libere disponendi nobis et Successoribus nostris reservantes per omnia potestatem Datum in Parco de Lannert Nonas Marcii Anno Domini MCC octogesimo tercio et Consecracionis nostre quarto