Charter Document - 03670025

Universis presentes Literas inspecturis Petrus miseracione Divina Exoniensis Episcopus salutem in Domino sempiternam Si tam naturali fedare quam precepto Divino sponsus habeat diligere sponsam suam consequens esse negari non poterit quin sponsus procurare et efficere debeat quecumque sponse sue congruere viderit commodo et honori Nos igitur attendentes quale et quantum Precentor Exoniensis Ecclesie in ipsa Ecclesia nomen gerat quam sit utile ipsius Officium et gravissimum onus ejus et exile seu quasi nullum ipsius stipendium mundiale proptereaque unum ex necessitate subsequencium secuturum cernimus ut Precentor ipse in Ecclesie predicte dispendium et multorum scandalum Officium hujusmodi implere congrue aut non possit aut negligat vel tali assignetur premissum Officium qui ei non conveniet in onere et honore cupientesque inconveniencium hujusmodi ab ipsa Sponsa nostra materiam amputare ac ordinare prout est possibile nostris viribus de Dignitate hujusmodi ut et digni cum vacaverit eam velint assumere et incumbencia ipsius onera valeant subportare Ecclesiam de Peyntone nostre Dioecesis que de nostro patronatu existit habito cum Capitulo nostro Exoniensi tractatu super hoc diligenti viij Idus Julii quo legitima citacione premissa in Ecclesia ipsa Visitacionis exercebamus Officium ac ut ipsi Visitacioni interessent omnes et singulos ipsius Ecclesie Canonicos fecimus evocari ipsius Capituli necnon dilecti filii Thome de Horepole Capellani nostri cui dudum prefatam Ecclesiam de Peyntone commendavimus accedente consensu Precentarie predicte perpetuo duximus adnectendam Statuentes ut ipsa Ecclesia una cum Ecclesia de Chuddeleghe unicum Beneficium censeatur ad Dignitatem pertinens memoratam et eandem constituens salva in utraque ipsarum Vicaria competenti volentes ut tam is qui eam inpresenciarum obtineret quam qui deinceps obtinebunt juramento specialiter prestito se astringant de facienda in dicta Exoniensi Ecclesia juxta antiquam ipsius consuetudinem residencia personali quam si forte facere neglexerint justo impedimento cessante puniendi ipsos per dictarum Ecclesiarum proventuum subtraccionem seu privacionem perpetuam si expedire viderimus nobis et Successoribus nostris potestatem Presentibus reservamus In cujus rei testimonium sigillum nostrum una cum sigillo Capituli nostri predicti Presentibus est appensum Datum Exonie die predicto Anno Domini MCC octogesimo secundo et Consecracionis nostre secundo