Charter Document - 03670010

Alexander Episcopus servus servorum Dei dilectis filiis Abbati Cistercii ejusque Coabbatibus et Conventibus universis Cisterciensis Ordinis salutem et Apostolicam Benediccionem Plantatus olim in agro Ecclesie vester Ordo sic a suis primordiis gracia operante Divina laudabilibus incrementis successive profecit quod assidue flores proferens copiosius honestatis et producens uberius fructus vite inter alia Plantaria Dominica puritate conversacionis dono sciencie et virtutei merito dinoscitur specialiter insignitus Unde nos in agro ipso cultores licet immeriti a Domino deputati eundem Ordinem grandi prosequi favore proponimus et exaltacionem ipsius jugis diligenti studio multipliciter procurare ut Apostolice gracie rore continue irroratus majoribus semper Deo tribuente consurgat et dilatetur incrementis Cum igitur Apostolica Sedes non nulla Privilegia et quam plures Indulgencias et Gracias eidem Ordini generaliter et quibusdam ex vobis specialiter sub diversitate temporum duxerit concedenda nos cupientes ea que vobis et ipsi Ordini a predicta Sede concessa sunt non solum integra et illesa servare immo pocius adaugere dilecti filii nostri Johannes tunc Sancti Laurencii in Lucina Presbiteri Cardinalis supplicacionibus inclinati hujusmodi Privilegia et Indulgencias ac Gracias vobis et eidem Ordini non obstantibus quibuscumque Constitucionibus Provisionibus Diffinicionibus et Ordinacionibus factis et promulgatis ab Apostolica Sede ad instanciam Prelatorum Ecclesie Gallicane et quorumcumque aliorum et quibuscumque Literis super hiis per eos vel per quos cumque alios optentis a Sede predicta per quas premissis Privilegiis et Indulgenciis ac Graciis in nullo derogari volumus Auctoritate Apostolica firmamus et presentis Scripti patrocinio communimus decernentes omnes Excommunicacionis Interdicti ac Suspensionis Sentencias si quas in vos vel vestrum aliquos aut in Monasteria seu quelibet Loca dicti Ordinis per predictos Prelatos aut quoscumque alios pretextu predictarum Constitucionum Provisionum Diffinicionum et Ordinacionum ac Literarum super hiis ab eadem Sede optentarum promulgari contigerit irritas et inanes Nulli [] si quis [] Datum Viterbii iij Nonas Novembris Pontificatus nostri Anno Tercio