Charter Document - 03660191
| Charter Number: | 03660191 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Appropriation |
| Date: | 1271 |
| Date type: | Internal, A.D., Feast |
| Resource Link(s): |
|
Charter:
Universis Sancte Matris Ecclesie filiis Presencium seriem Literarum visuris vel audituris Walterus miseracione Divina Exoniensis Episcopus salutem in Domino sempiternam Noverit Universitas vestra quod nos animarum saluti subvenire cupientes ad peticionem quin pocius inportunam instanciam dilecti filii Domini Thome de Hertfort Archidiaconi Tottoniensis et Ecclesie nostre Exoniensis Canonici preaccepta Beneficia more grati et hominis benemeriti reminiscentis accedente assensu et voluntate expressa dilectorum filiorum Rogeri de Toriz Decani Exoniensis et ejusdem Loci Capituli concedimus et Presencium tenore appropriamus Ecclesiam de Upottri cujus veri sumus Patroni memoratis Decano et Capitulo cum omnibus pertinenciis suis excepta Vicaria sufficienti in eadem in perpetuum possidendam ad sustentacionem trium Capellanorum pro animabus Venerabilium Patrum Willelmi Bruer Ricardi Blundi Predecessorum nostrorum Episcoporum Exonie nostra dicti Domini Thome et omnium Fidelium defunctorum in Altari in honore Beati Johannis Baptiste Blasii et Pyrani in Navi dicte Ecclesie Exoniensis dedicato et ad hoc assignato ministrandorum et aliorum onerum subscriptorum ita videlicet quod quilibet de Capellanis antedictis per manus Senescallorum ejusdem Ecclesie Exoniensis sexaginta solidos quatuordecim pueri porcionarii ad Officium Chori pro tempore deputati et futuris temporibus in perpetuum ad Salutacionem Gloriose Virginis Matris Domini singulis diebus post Completorium sonora voce et dulci faciendam intitulati viginti et octo solidos in quatuor Anni Terminis principalibus pro rata annuatim percipiant et quod predicti Decanus et Capitulum obitum dicti Domini Thome postquam de hac vita subtractus fuerit duodecim solidos singulis annis die obitus sui secundum antiquam Ecclesie Exoniensis Consuetudinem per Senescallos suos in Choro distribuendo fieri faciant et panem vinum candelas et cetera omnia dictis Capellanis quos singulis Horis in dicta Ecclesia in posterum psallendis interesse volumus et ad oracionem in Missis suis in vita et in morte Altissimo pro nobis specialiter et jugiter effundendam in titulatus in Altari predicto faciendam quod incumbit necessaria inveniant et competenter subministrent cura animarum predicte Ecclesie Upottri et onere ordinario ad Vicarium qui pro tempore prefuerit in eadem totaliter pertinentibus In cujus rei testimonium [] Actum in Capitulo Exoniensi die Jovis post Festum Sancti Hyllarii anno domini MCCLXX