Charter Document - 03660182

In Nomine Domini Amen Sicut plantatos in Ecclesia Dei fructificantes decens est et honestum confovere ut crescendo dilatati bonorum operum fructus faciant ampliores pari videtur racione non minimum expedire aridos et infructuosos quos nulla poterit culture diligencia ad fructificandum perducere ne bonarum arborum locum in vanum occupent a plantario Domus Divine penitus exstirpatos quam procul expellere in doloribus et angustiis concremandos Sane cum nos Walterus Dei gracia Exoniensis Episcopus in vinea Domini prout sollicitudo Pastoralis exigit laborantes intelleximus quod Johannes dictus Chubbe Abbas Tavistokie ob manifestas offensas et contumacias vinculo Majoris Excommunicacionis per Commissarios nostros esset innodatus idem Abbas in spiritu devocionis ut videbatur ad nos veniens reatus suos recognoscens et statum suum ut asseruit cupiens emendari prestito juramento ab eodem corporali promiserit quod super premissis contumacius et offensis ad voluntatem et Ordinacionem nostram sine strepitu judiciali satisfaceret ad plenum Ordinacioni nostre alte et basse se sponte submittendo volens et concedens quod si contra premissa vel aliquo premissorum ullo unquam tempore veniret in pristinam ipso facto retruderetur Sentenciam Excommunicacionis et hiis factis ad ejus instanciam ipsum duximus absolvendum Ipse vero Abbas postmodum animo indurato quod per juramentum facere promiserat irreverenter adimplere contempsit propter quod nos ipsum in pristinam retrusi mus Excommunicacionis Sentenciam justicia exigente Qui temporis processu ad spiritum sanioris consilii ut asseruit rediens et notam inobediencie et perjuri per Ecclesiastice Discipline meritum redimere cupiens Absolucionis Beneficium instanter sibi a nobis impendi petiit iterato Et quia ad satisfaccionem condignam premissorum tunc minime sufficiebat ut dixit super omnibus premissis contumacius offensis et inobediencis ordinacioni gracie et voluntati nostre se et statum suum alte et basse secundo submisit absolute et inspectis Sacrosanctis Evangeliis prestito ab eodem Abbate iterato juramento corporali promisit et se sponte obligavit sub debito juramenti prestiti quod super premissis omnibus et singulis nostram voluntatem seu ordinacionem prescisse subiret servaret et teneret nec ullo unquam tempore in aliquo contraveniret volens eciam et concedens quod si contra premissa vel aliquod premissorum quoquo modo veniret jure et regimine Abbatie predicte esset privatus ipso facto prout hec omnia in Literis ipsius Abbatis plenius continentur Unde idem Abbas sub forma predicta Beneficium Absolucionis meruit optinere Prefatus vero Abbas proprii honoris et salutis immemor reatum perjuri non formidans quod per juramentum facere promisit licet sepius monitus inobedienter adimplere neglexit Cumque postmodum de ipso Abbate una cum premissis ea nobis frequenter insinuata fuissent que ab honestate regulari nimium dissonabant frequentibus fide dignorum clamoribus excitati et per Monachos ejusdem Monasterii instanter interpellati in dicto Monasterio Tavistokie associatis nobis viris Religiosis ejusdem Ordinis et aliorum tum per nos cum per clericos nostros diversis vicibus prima vice eodem Abbate presente secunda contumaciter absente de statu dicti Abbatis prout cura Pastoralis Officii requirit in forma juris inquisivimus et inquiri fecimus diligenter Unde per deposicionem Monachorum ejusdem Monasterii necnon per deposicionem aliorum fide dignorum clericorum et laicorum juratorum qui veritatem rei geste melius cognoverunt repertum fuit esse probatum quod dictus Abbas est dicti Monasterii bonorum dilapidator intolerabilis et manifestus Monachalis Discipline regulam ad quam voto Professionis est astrictus deserendo propter quam auctoritate nostra ab administracione temporalium bonorum ejusdem Monasterii fuit suspensus qui dicta Suspensione non obstante Custodem temporalium bonorum dicti Monasterii per nos de consensu Monachorum ibidem deputatum impediens quominus de eisdem ad utilitatem ejusdem Monasterii disponeret eadem bona ut prius immo gravius et enormius dilapidandi et spreta Monastice Regule Constitucionum Regularium disciplina idem Abbas spiritum furoris assumens cum suis complicibus quos secum adduxit in quemdam de Monachis suis Divina celebrantem sacris vestibus quibus erat indutus violenter exui et ipsum ab Ecclesia extrahi et captivum in Cameram suam perduci fecit et diucius ibidem detineri Hiis vero non contentus in quosdam de ipsis Monachis necnon in quosdam de familia eorundem Dei timore postposito in suo claustro hora nocturna manus injecit temere violentas In quosdam autem Monachos ad Ecclesiam ob sui tuicionem fugientes et in eadem existentes insultum fecit terribilem et enormem ostia Monasterii armis ferreis perforando incendium in predicto claustro commisit ostia Celeri Ecclesie et Thesaurario confregit arcam in qua sigillum commune et Carte et instrumenta dicti Monasterii sub custodia duorum Monachorum ad hoc per Conventum electorum una cum ipso erant inclusa ac eciam Cartas Libros Calices consecratas ac alias res varias et plures fecit violenter deferri et ipsos sigilli Custodes in Ecclesia cum violencia capi et ad Cameram suam captivos perduci et ipsos per totam noctem incarceratos fecit detineri quousque de dicto sigillo et rebus aliis suam plene fecerant voluntatem aliaque enormia in anime sue periculum Monasterii dispendium et scandalum multorum perpetravit Idem eciam Abbas diversis Excommunicacionis Sentenciis Majorie astrictus ipsarum Sentenciarum non ignarus Divinis se immiscuit irreverenter Omnibus premissis cum animi suspiriis et cordis angustiis consideratis et diligenter ponderatis intelligentes secundum Canonicas Sancciones quod magis expedit paucos bonos quam multos malos in Ecclesia Dei habere Ministros et putridum membrum procul ab Ecclesia Dei fore deiciendum nos communicato jurisperitorum consilio prefatum Johannem Choubbe Abbatem legitime citatum et canonice expectatum prefati Abbatis absenciam Dei replente presencia tanquam male meritum et predicto Monasterio propter predicta et alia dampnosum ab administracione prefate Abbatie jure et regimine ejusdem per Sentenciam Diffinitivam deponimus privamus et totaliter amovemus et pronunciantes predictum Monasterium regimine Abbatis de jure et de facto vacare Et quia ubi magis exceditur ibi severius est vindicandum prenominatum Johannem Chubbe a Celebracione Divinorum suspendimus per triennium omnes Monachos dicti Monasterii ab ejusdem obediencia vassallos quoque et alios quoscumque sibi quacumque fide racione dicti Monasterii prius astrictos ab ejus fidelitate per eandem Sentenciam absolvimus Verum quia idem Johannes notam irregularitatis videtur multipliciter ex diversis causis incurrisse questiones irregularitatis ipsius plenius examinandas et examine juridico discuciendas nobis et Sedi Exoniensi reservamus Datum et Actum in Capitulo Conventuali de Tavistoke Anno Domini MCC sexagesimo nono in crastino Sancti Edwardi Regis et Martiris