Charter Document - 03660176
| Charter Number: | 03660176 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Taxation |
| Date: | 1260 |
| Date type: | Internal, A.D., Episcopal, Feast |
| Resource Link(s): |
|
Charter:
Universis presentes Literas inspecturis Walterus miseracione Divina Exoniensis Episcopus salutem in Domino sempiternam Officii nostri debitum exequentes ut tenemur Ecclesiam de Strattone quam Prior et Conventus de Lancevetone in usus proprios dicuntur obtinere pleno jure collatam Vicaria canonice taxata carentem invenimus Cum igitur nostrum sit ex Officio subditorum nostrorum scissuras resarcire ad instanciam et de expresso consensu eorundem Prioris et Conventus et Johannis de Lisnewith presbiteri qui se dicit ejusdem Ecclesie Vicarium Ordinacioni nostre se pure supponencium et eam servare bona fide promittencium ad ipsius Ecclesie Ordinacionem et dicte Vicarie Taxacionem competenti estimacione proventuum ipsius Ecclesie premissa duximus procedendum taliter ordinantes quod eodem Johanne ipsius Ecclesie Perpetuo Vicario remanente idem Vicarius et successores sui post ipsum omnes obvenciones redditus et proventus majores et minores ipsius Ecclesie et totam terram Sanctuarii annuo censu libere tenencium dumtaxat excepto integre percipiant et de iisdem disponant pro sue libito voluntatis et omnia ipsius Ecclesie onera debita et consueta taliter agnoscant ac predictis Priori et Conventui viginti quinque marcas argenti in Conventuali Ecclesia Sancti Stephani de Lancevetone in Festo Omnium Sanctorum vel infra quintanam et in Festo Resurrectionis Dominice equis porcionibus annuatim persolvant necnon et quicquid de ipeius Ecclesie proventibus preter dictas viginti quinque marcas superfuerit nomine Vicarie habeant tanquam suum ita tamen quod si idem Vicarius vel successores sui post ipsum in dicte pecunie solucione cessaverint si infra triduum postquam cessaverint moniti non satisfecerint ex tunc liceat Priori et Canonicis predictis ad Vicariam ipsam tanquam de jure vacantem ydoneam Personam canonice presentare In cujus rei testimonium presentes Literas eisdem Canonicis et Vicario duximus concedendas Acta publice in Conventuali Capitulo de Lancevetone in crastino Festi Nativitatis Sancte Marie ab Incarnacione Domini MCC sexaginta et Consecrationis nostre Anno tercio