Charter Document - 03660169

Walterus Dei gracia Exoniensis Episcopus dilecto filio Decano Sancti Germani in Cornubia graciam et benediccionem Cum Prioratus Sancti Germani in Cornubia cum possessionibus et juribus ad eundem Prioratum pertinentibus tam in temporalibus quam in spiritualibus una cum ejusdem Prioratus Custodia cum vacaverit ad nos et ad Ecclesiam nostram Exoniensem pertinent pleno jure in quorum possessione pacifica nos et Predecessores nostri racione Ecclesie nostre Exoniensis predicte extitimus a tempore cujus non extat memoria et adhuc existimus et hec omnia et singula in partibus Cornubie ac eciam per totam Dioecesim nostram Exoniensem publica et notoria existant ac quidam Sathane satellites proprie Salutis immemores Ministros nostros dicti Prioratus per mortem Ricardi nuper Prioris ejusdem vacantis nomine nostro Custodiam habentes violenter expulerint seu ejecerint seu eosdem quo minus pacifice dictum Prioratum nomine nostro custodirent maliciose perturbaverint seu inquietaverint ac eciam eosdem adhuc perturbare seu inquietare non desistunt libertatem Ecclesiasticam infringendo seu perturbando in manifestum detrimentum nostrum et Ecclesie nostre Exoniensis prejudicium non modicum et gravamen ac Ecclesiastice libertatis subversionem propter quod non est dubium ipsos in Sentenciam Excommunicacionis Majoris dampnabiliter incidisse ipso facto vobis mandamus in virtute obediencie firmiter injungentes quatinus associatis vobiscum sex vicinis Rectoribus Vicariis seu Capellanis Prioratum predictum personaliter adeatis et omnes predictos malefactores in predictam Excommunicacionis Majoris Sentenciam in genere incidisse publice nuncietis Si quos eciam de hujusmodi malefactoribus ibidem inveneritis Ministros nostros predicti Prioratus Custodes super ejusdem Prioratus Custodia possessionibus juribus seu rebus quibuscumque ad eam pertinentibus perturbantes seu in aliquo molestantes ipsos moneatis quod ab hujusmodi perturbacione seu impedimento penitus desistant alioquin ipsos omnes et singulos specialiter et nominatim per totum Decanatum vestrum et alibi ubi expedire videritis Diebus Dominicis et Festivis pulsatis campanis et candelis accensis in dictam Excommunicacionis Sentenciam incidisse publice nuncietis et nunciari faciatis quousque Absolucionis Beneficium in forma juris meruerint obtinere Et quid super hiis feceritis nos per Literas vestras Patentes harum seriem continentes reddatis cerciores Datum apud Nymetone in crastino Sancti Laurencii Martiris Anno Gracie MCCLXX nono