Charter Document - 03660164
| Charter Number: | 03660164 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Appropriation |
| Date: | 1278 |
| Date type: | Internal, A.D., Calendar, Episcopal |
| Resource Link(s): |
|
Charter:
Universis Sancte Matris Ecclesie filiis presens Scriptum visuris vel audituris Walterus miseracione Divina Exoniensis Episcopus salutem in Domino sempiternam Eo puriori desiderio et fervenciori zelo felici Celestis Curie Senatui licet nostro non egeat ministerio honorem quem possumus pro nostro infirmitatis modulo impendere nitimur quo eundem humane fragilitatis custodie credimus et speramus deputatum certis Beatis Spiritibus Angelicis certis Fidelium animabus a Summo Celi Opifice misericorditer assignatis Proinde celebrem ejusdem Curie Paranimphi Sancti videlicet Gabrielis memoriam cujus beneficium Divina volente clemencia frequenter sensimus nobis profuisse sicut possumus honorare cupientes Ecclesiam Sancti Brueredi in Cornubia cujus Advocacio ex nostra canonica adquisicione ad nos pertinere dinoscitur dilectis filiis Decano et Capitulo Exoniensi nostro in proprios usus assignatam presentis attestacione Scripture appropriamus in forma inferius annotata videlicet quod prefati Decanus et Capitulum et eorum successores singulis annis prima die Lune Mensis Septembris in nostra Majori Ecclesia Beati Petri Exonie ejusdem Sancti Gabrielis memoriam consimili honore in luminaribus et aliis que in Die Natalis Domini vel Pasche fieri consuevit sollempniter celebrent inperpetuum Ordinantes quod quilibet Canonicus presenciam suam corporalem dicte Sollempnitati exhibens preter cotidianas distribuciones ipsa die duos solidos quilibet Vicarius similiter presens duodecim denarios quilibet Clericus de Secunda Forma in Sacris constitutus sex denarios quilibet puer Chori infra debitum numerum existens duos denarios de bonis Ecclesie memorate percipiant annuatim Ordinamus insuper quod in proxima sequenti tercia feria mensis ejusdem videlicet in crastino Festi predicti fiat in Ecclesia nostra predicta inperpetuum sollempnis Anniversarius Dies per prefatos Decanum et Capitulum eorumque successores pro anima nostra et pro animabus bone memorie Willelmi et Ricardi Predecessorum nostrorum Episcoporum Exonie et pro animabus Patris et Matris nostre benefactorum nostrorum omniumque Fidelium defunctorum ita quod quilibet Canonicus in hac sollempni commemoracione presens duos solidos quilibet Vicarius duodecim denarios quilibet Clericus de Secunda Forma in Sacris constitutus sex denarios quilibet puer Chori duos denarios ipso die de bonis ejusdem Ecclesie perpetuo participant annuatim Statuentes ut quolibet anno tercia feria predicta prefati Decanus et Capitulum et eorum successores quingentos pauperes debiles pascant annuatim ita quod annona cujuslibet unum denarium valeat in esculentis et poculentis Volumus eciam et ordinamus ut totum residuum proventuum dicte Ecclesie Sancti Brueredi inter Canonicos quos utrisque Sollempnitatibus predictis interesse contigerit equaliter dividatur et non in alios usus convertatur salva competenti Vicaria in dicta Ecclesia Sancti Brueredi quam in toto altalagio et toto Sanctuario exceptis duabus acris Anglicanis terre in quibus dicte Decanus et Capitulum possint edificare una cum decimis garbarum Ville Minoris Lanke et tota decima feni consistere ordinamus per nos et Successores nostros honeste Persone que omnia onera ordinaria debita et consueta sustinebit perpetuo conferenda Statuimus quoque et ordinamus quod quilibet Decanus et Canonicus in sui creacione hanc nostram Ordinacionem una cum aliis antiquis et approbatis Ecclesie Exoniensis Consuetudinibus juret obeervare In cujus rei testimonium sigillum nostrum Presentibus duximus apponendum Datum in Capitulo Exoniensi Nonas Septembris anno domini MCCLXX octavo et consecracionis nostre vicesimo primo