Charter Document - 03660146

Universis presentes Literas inspecturis Walterus dictus le Hostiler Canonicus Plymptonie Procurator Subprioris et Conventus Plymptonie salutem in Domino sempiternam Noverit Universitas vestra quod cum inter Venerabilem Patrem Dominum Walterum Dei gracia Exoniensem Episcopum ex parte una et Conventualem Ecclesiam Plimptonie ex altera super possessione vel quasi jure patronatus Advocacionis seu Custodie quam idem Episcopus tempore vacacionis ipsius Ecclesie se et Predecessores suos habere solere proponit in eadem et super Eleccione de Fratre Roberto dicto Blundo nuper in ejusdem Ecclesie Priorem electo celebrata ac quibusdam Excommunicacionis Suspensionis et Interdicti Sentenciis tam per dictum Episcopum quam per ejus Officiales diversis temporibus promulgatis necnon et aliis Articulis coram diversis Judicibus tam auctoritate ordinaria quam delegata motis et pendentibus suborta esset materia questionis tandem honorem et tranquillitatem dictorum Domini Episcopi et Ecclesie Plymptonie utiliter considerans procuratorio nomine Subprioris et Conventus predictorum recognosco concedo et assencio quod idem Dominus Episcopus in primis habeat pacificam possessionem vel quasi Custodie Prioratus Plymptonie ipso vacante qualem Predecessores sui habere consueverunt et ea pacifice utatur et quiete Item procuratorio nomine Subprioris Sacriste Cantoris Cellerariis Senescalli necnon et Conventus Plymptonie humiliter peto quod recepto sacramento meo nomine ipsorum de stando seu parendo Mandatis Ecclesie a predictis Sentenciis per Dominum Episcopum absolvantur Et promitto nihilominus sub debito ejusdem juramenti quod aliqui de supradictis nominatim excommunicatis cum aliquibus de Conventu predicto certo die ab eodem Episcopo statuendo comparebunt in Majori Ecclesia Exoniensi cum plena potestate petendi Absolucionis Beneficium nomine predictorum et petant humiliter ab eo absolvi in forma juris quod quidem Absolucionis Beneficium idem Dominus Episcopus impendet taliter requisitus Item quantum ad offensam contumaciam et alios Articulos contenciosos qualitercumque motos inter dictos Episcopum et Religiosos suppono me et dictos Subpriorem et Conventum procuratorio nomine Arbitrio Ordinacioni Diffinicioni seu Laudo discretorum virorum Dominorum Decani Wellensis Henrici de Brattone Exoniensis et Norfolchiensis Archidiaconorum ita quod ipsi vel alius seu alii loco absentis vel absencium subrogandus vel subrogandi infra proximo venturum Festum Exaltacionis Sancte Crucis in Episcopatu Exoniensi Arbitrium Diffinicionem Ordinacionem seu Laudum suum proferant Et promitto me et dictos Subpriorem et Conventum Arbitrium Diffinicionem Ordinacionem seu Laudum predictorum in omnibus et per omnia sub pena centum librarum argenti a Parte renitente Parti stare volenti solvendarum precise observaturos nisi inter dictos Episcopum et Religiosos negocium ipsum per seipsos alio modo temperari seu terminari valeat sine strepitu Postmodum vero facta renunciacione a Fratre Roberto dicto Blundo super Eleccione in Priorem Plymptonie de se ut dicit celebrata petant Subprior et Conventus predicti ab eodem Episcopo Licenciam eligendi more debito et consueto qua sine difficultate optenta idem Conventus ad Eleccionem de predicto Roberto vel alio de Conventu procedat et eam dicto Episcopo representet et idem Dominus Episcopus quod justum fuerit in hac parte exequatur cum gracia et favore Omnia vero supradicta Sentenciam dicti Domini Episcopi et Officialium suorum tangencia idem Dominus Episcopus sub simili pena se servaturum promittat In cujus rei testimonium presentibus Literis sigillum meum appono Et idem Episcopus in testimonium sui consensus signum suum apponi precepit Hiis testibus Dominis Henrico de Tracy Henrici de Brattone Randulpho de Dodescumbe Johanne de Westone Magistris Johanne Nobili Roberto Everarde Johanne de Bradele Johanne Wyger Gervasio de Crydetone Willelmi de Ralegh Willelmo de Cappella et aliis Actum apud Wynkele xij Kalendas Septembris Anno Gracie MCCLXIIJ