Charter Document - 03660141
| Charter Number: | 03660141 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1259 |
| Date type: | Internal, Episcopal, Feast |
| Resource Link(s): |
|
Charter:
Omnibus Sancte Matris Ecclesie filiis presens Scriptum visuris vel intellecturis Walterus Dei gracia Exoniensis Ecclesie Minister humilis salutem in Domino sempiternam Noveritis quod cum inter Rogerum de Sancto Constantino et Johannem Heym clericos super Ecclesia Beati Pauli in Cornubia que ad Advocacionem Domini illustris Regis Alamannie spectare dinoscitur controversie materia orta fuisset tandem eisdem juri quod se in dicta Ecclesia vel ad Ecclesiam ipsam habere asserebant vel habebant de mera et spontanea voluntate sua pure et absolute renunciantibus et Ordinacioni nostre totaliter se subponentibus quam Ordinacionem sacramento corporali prestito se servaturos promiserunt Nos Divina invocata Gracia de consensu prefati illustris Regis dicte Ecclesie veri Patroni in forma subscripta ordinavimus et ordinamus videlicet quod dictus Rogerus dictam Ecclesiam cum suis pertinenciis et cum cura animarum habeat et dicto Johanni Heym sexaginta solidos singulis annis in Festis Beati Michaelis et Pasche pro rata de bonis dicte Ecclesie sub pena unius marce nobis quociens commissa fuerit solvende persolvat Ita quidem quod alterutro eorum cedente vel decedente dicta Ecclesia cum pertinenciis suis superstiti remaneat Predictus vero Rogerus de oneribus ordinariis et consuetis ad dictam Ecclesiam spectantibus veluti ejusdem Rector respondebit In cujus rei testimonium presentem Cartam fieri fecimus Patentem Datum Londoniis in crastino Philippi et Jacobi Consecracionis nostre Anno secundo