Charter Document - 03660137
| Charter Number: | 03660137 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1275 |
| Date type: | Internal, Episcopal, Feast |
| Resource Link(s): |
|
Charter:
Walterus miseracione Divina Exoniensis Episcopus dilecto filio Archidiacono Exoniensi salutem graciam et benediccionem Ex relacione quorumdam intelleximus quod non nulli Sathane satellites nervum Ecclesiastice Discipline rumpere cupientes et manum ad que non licet extendere molientes vi majori et manu armata Willelmum de Sancto Gorono diaconum Rectorem Ecclesie de Otery Sancte Marie nostre Dioecesis canonice ibidem institutum contra libertates Ecclesie et pacem Domini Regis et Regni proponunt eadem Ecclesia fructibus et juribus ad ipsam pertinentibus spoliare Quo circa vobis mandamus quatinus ad obviandum tante iniquitatis proposito cum signa hujusmodi facinoris committendi videritis convocatis omnibus sacerdotibus Decanatus de Aylesbere aliisque vicinis prout videritis expedire ad Locum ipsum mittatis eosdem sacerdotalibus indutos et processionaliter incedentes ad Ecclesiam predictam ad commonendum hujuscemodi violatores sub pena Majoris Excommunicacionis ipso facto incurrende ut a tam nefario proposito desistant omnino Alioquin si in maleficio processerint malefactores tales in canonem late Sentencie publice et sollempniter candelis accensis pulsatis campanis denuncient incidisse de nominibus malefactorum diligencius inquirentes Et qualiter Mandatum nostrum fueritis executi nos per Literas vestras Patentes harum seriem continentes quam citius poteritis certificetis Datum apud Peyntone die Nativitatis Beate Marie Consecracionis Nostre Anno xviij