Charter Document - 03660136

Walterus Dei gracia Exoniensis Episcopus dilecto filio Magistro J[ohanni de Esse] Officiali nostro salutem graciam et benediccionem Cum nos oporteat juris execucioni circa Sanctorum Patrum Statuta intendere quamquam penarum comminacionem in se non contineant expressam si reprehensionis et inobediencie notam velimus evitare ac nuper in Concilio Lugdunensi fuerit statutum ut Beneficiati precipue quorum Beneficiis cura animarum est annexa se faciant intra certi temporis curricula in presbiteros ordinari pleraque eciam Sanctorum Canonum de hujusmodi Beneficiatis ordinandis dudum edita sint Statuta de quorum edicione in personis multorum nostre Dioecesis rarus hactenus fructus pervenit ideoque ne nos ubi pro juris execucione diligenter impensa premium merito foret expectandum pro culpa negligencie nostre penam formidemus vobis mandamus quatinus omnes Rectores et Vicarios Parochialium Ecclesiarum nostre Dioecesis qui non sunt jam in presbiteros ordinati peremptorie citetis et citari publice et sollempniter faciatis abeque personarum delectu necnon et Prebendalia Beneficia in Ecclesiis Collegiatis habentes quod in proximis Quatuor Temporum ante Festum Natalis Domini in Ecclesia Parochiali de Toritone conspectui nostro se representent Ordines Sacros prout status cujuslibet requirit sub pena in predicto Concilio et Sacris Canonibus contenta recepturi Verum quia non nulli rerum Ecclesiasticarum defraudatores fructus Ecclesiarum suarum dilapidando tocius anni victum brevi spacio temporis soliti sunt consumare ut sic quasi inanes gratis effecti non valeant de facili ad hujusmodi et similia tam ordinaria quam extraordinaria cum effectu coherceri vobis districte precipiendo mandamus quatinus si quos nostre Dioecesis inde suspectos inveneritis ipsis ab administracione bonorum Ecclesiasticorum que in nostra optinent Dioecesi exigente justicia primitus suspensis fructus Beneficiorum suorum sub cujuscumque manu existant sequestretis facientes eosdem sub firmo Sequestro teneri donec juri paruerint cum effectu in hac parte Qualiter autem Mandatum nostrum in hac parte fueritis executi nos dictis die et loco per Literas vestras Patentes harum seriem continentes certificare curetis Datum apud Clist die Jovis proxima ante Festum Sancte Margarete Virginis Consecracionis Nostre Anno xviij