Charter Document - 03660132

Universis [] Episcopus [] Fide dignorum assercione intelligentes quod quidam Parschiani Ecclesie de Lideforde villulagia que dicuntur Babbeneye et Pushylle inhabitantes adeo distant ab eorum Ecclesia Matrice predicta quod eam pre nimia distancia nullo modo visitare possunt quociens eis fuerit oportunum dilecto filio Officiali Archidiaconi Tottoniensis nostris Literis dedimus in Mandatis ut facta Inquisicione sollempni in pleno Capitulo ejusdem Loci nos litteratorie reddet cerciores an homines predicti ad ereccionem sufficerent Oratorii item que Parochialis Ecclesia villulis ipsis vicinior existat in qua iidem homines sine prejudicio juris alieni audire Divina et Ecclesiastica percipere valeant Sacramenta et quanto eedem villule distant a Matrice Ecclesia predicta et si tempestatibus et inundacionibus aquarum exortis Parochianis ipsis Matricem Ecclesiam predictam visitare volentibus via longior debeatur Cumque per certificacionem Officiaiis memorati invenerimus quod incolis ipsis ad construccionem Oratorii minime sufficientibus Parochialis Ecclesia de Wydecumba Locis ipsis plus aliis omnibus est vicina et quod Loca predicta a Matrice Ecclesia de Lideforde sereno tempore per octo et tempestatibus exortis in circuitu per quindecim distant miliaria salutem animarum sicut nec debemus negligere nulla racione volentes Ecclesiarum ipsarum Rectores ad nostram fecimus presenciam evocari Rectoribus igitur predictis eorum nobis constitutis et exposito eisdem hujuscemodi periculo ac depresso consensu utriusque Ecclesie Patronorum Ordinacioni nostre se supponentibus promittentibusque bona fide voluntati nostre parere in hac parte ac nostram Ordinacionem predictam observare inperpetuum de consilio prudencium virorum nobis assistencium taliter ordinavimus videlicet quod predictorum et adjacencium Locorum incolis sicut in veritate sunt parochianis Ecclesie de Lideforde perpetuo remanentibus in Ecclesia de Wydecumbe inposterum Divina audiant et omnia in vita et morte Ecclesiastica percipiant Sacramenta In coopertura et fabrica Ecclesie de Wydecumba clausura cimiterii subsidio luminarium et deferendo Pane Benedicto cum ipsius Ecclesie parochianis contribuant consuetudines ipsius Ecclesie in visitacionibus infirmorum benediccionibus nubencium in purgacionibus post partum in baptismatibus parvulorum in mortuariis et sepulturis moriencium observent offerant quoque ibidem sollempniter ter in anno et decimam nihilominus agnorum eidem Ecclesie cum integritate persolvant In signum vero subjeccionis et agnicionem juris parochialis quilibet incola dictorum Locorum terram tenens semel in anno videlicet die Sancti Petroci in Ecclesia de Lideforde sollempniter offerat et omnes decimas et obvenciones majores et minores hiis dumtaxat exceptis que superius enumerantur Matrici Ecclesie sue de Lideforde sine qualibet diminucione et contradiccione persolvant In cujus [] Datum apud Credetoniam xiij Kalendas Septembris anno domini MCC sexagesimo