Charter Document - 03660122
| Charter Number: | 03660122 |
|---|---|
| Cartulary Title: | The Register of Walter Bronescombe, Bishop of Exeter, 1258-1280. |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1270 |
| Date type: | Internal, A.D., Feast |
| Resource Link(s): |
|
Charter:
Noverint universi presentes Literas visuris vel audituris quod nos Robertus Decanus Saresbirie et ejusdem Loci Capitulum in recompensacionem juris Episcopalis quod deperire posse videretur per Ordinacionem bone memorie Domini Willelmi quondam Episcopi Exoniensis super Prebenda de Teyntone quam Ecclesia Sarumensis in Dioecesi Exoniensi habuit assensu unanimi et communi Capituli sui Exoniensis necnon et Venerabilis Patris Domini Roberti tunc Sarumensis Episcopi et Loci ejusdem Capituli accedentibus factam concedimus quod Decanus Sarumensis qui pro tempore fuerit Domino Waltero Dei gracia nunc Exoniensi Episcopo et Successoribus suis Episcopis Exonie manualem prestet obedienciam de Ecclesiis per Ordinacionem ipsam in perpetuos usus commune nostre [appropriatis] Concedimus insuper in augmentum Cultus Divini quatuor marcas ad sustentacionem Capellani pro animabus prefati Domini Walteri Exoniensis Episcopi Successorum suorum et omnium Fidelium defunctorum in Ecclesia Exoniensi vel in Capella sua ibidem prout elegerit ministraturi annuatim in Festo Beati Michaelis in perpetuum solvendas per manus Vicarii nostri Ecclesie nostre de Alphintone pro tempore existentis In cujus rei testimonium presentibus Literis nostris sigilla nostra fecimus apponi Datum apud Chuddeham die Jovis proxima ante Festum Sancti Barnabe Anno Gracie MCC septuagesimo