Charter Document - 03660085

Universis presentes Literas inspecturis Walterus miseracione Divina Exoniensis Episcopus salutem in Domino sempiternam et perpetuam rei geste memoriam In plantario Christiane Professionis superni manus Opificis sancte institucionis lilium Ecclesiasticas videlicet personas miro dispensacionis munere divinitus instituens pium posteris reliquit exemplum collocandi in Ecclesia Dei idoneas personas ad Divini Cultus augmentum et Domus Dei decus et decorem ampliandum Sane de Almi Exemplaris promptuario aliquod peculiaris operis in Vinea Domini Sabbaoth pro nostre possibilitatis modulo assumere cupientes Christi Fidelibus Spiraminis infusione Divini profuturum infra limites Parochialis Ecclesie Sancti Budoci in Cornubia cui propter ipsius proventuum exilitatem Parochialem Ecclesiam Beati Thome de Penren sibi coherentem similiter in facultatibus tenuem annectendo unimus et uniendo annectimus de cetero velut dependentem Collegiatam Ecclesiam in honore Sancte Dei Genitricis Marie et Beati Thome Gloriosi Martiris loco qui dicitur Glasneya competenti opere duximus construendam assignantes ei pro fundamine omnes dicte Ecclesie Sancti Budoci divise in porciones ab antiquo ac taliter unite seu annexe Ecclesie necnon et Ecclesie Sancte Feoce fructus et proventus porcionibus Vicariorum eis deserviencium dumtaxat exceptis ad victum et sustentacionem Clericorum ibidem perpetuo ministrancium Ordinamus eciam et attitulatus in predicta Ecclesia tredecim Personas ad presens institui quos Canonicos Seculares appellari volumus statuentes ut laudabiles approbatas et approbandas Exoniensis Ecclesie Consuetudines perpetuo ibidem observent et ut singuli eorum per se vel per idoneos Vicarios singulos viginti solidos de Dominorum suorum porcionibus annuatim percipientes honeste et continue deserviant in eadem Ceterum premissis adiciendo ordinamus ut unus ex dictis Porcionariis Procurator sit Collegii et Procuratoris nomine appelletur quousque de Capitaneo seu Custode habita cum Capitulo nostro deliberacione pleniori aliter duxerimus ordinandum Et quod quilibet ex ipsis tredecim Personis sex marcas nomine porcionis annuatim percipiat de bonis hujusmodi Ecclesiarum Parochialium assignatas ita videlicet quod quicquid ex bonis pia collacione Fidelium ad sustentacionem hujusmodi Ministrorum assignatis vel assignandis ultra prefatam summam sex marcarum auctore Domino creverit in futurum residentibus et Matutinis vel in Magna Missa presentibus vel principalem mense refeccionem in eodem loco sumentibus ad que intrantes Canonicos prima die adventus sui nolumus artare nomine cotidiane distribucionis accrescat Ad hec diffiniendo ordinamus ut in qualibet ex predictis tribus Ecclesiis unus ordinetur Vicarius Perpetuus per nos et successores nostros Canonice instituendus curam plebis habens et quilibet in sua jugem ac continuam faciat residenciam personalem Et quod dictarum Vicariorum necnon et dicte Collegiate Ecclesie porcionum Collacio ad nos et successores nostros Episcopos Exonienses pertineat in futurum augendi quoque numerum Ministrorum et eorum supplendi porciones cum expedire viderimus prout Loci creverint facultates et alia reformacione forsan digna inmutandi nobis potestatem retinemus Premissa vero omnia fecimus et ordinavimus salvis in omnibus dignitate et honore Episcopali jure Ecclesie Exoniensis et jure Archidiaconali tam in appropriatis quam in appropriandis Ecclesiis In hujus rei testimonium ad eternam memoriam sigilli nostri et Dominorum Decani et Capituli Exonie munimine presentem paginam duximus roborandam Actum et Datum apud Glasneiam septimo Kalendas Aprilis Incarnacionis Dominice Millesimo ducentesimo sexagesimo septimo Consecracionis nostre decimo et Fundacionis Loci predicti anno tercio